ព្រឹកថ្ងៃព្រហស្បតិ៍ ១កើត ខែបឋមាសាឌ ឆ្នាំច ព.ស២៥៦២ ត្រូវនឹងថ្ងៃទី១៣ ខែ មិថុនា ឆ្នាំ២០១៨ ឯកឧត្តម វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ ឯកឧត្តម វ៉ី សំណាង អភិបាល នៃគណៈអភិបាល ខេត្តកំពង់ស្ពឺ បានអញ្ជើញជាអធិបតីក្នុងពិធីអន្តរាគមន៍ភ្ជួររាស់ដីជូនកសិករក្រីក្រ ខ្វះមធ្យោបាយ និងកម្លាំងពលកម្ម ក្នុងផលិតកម្មកសិកម្មឱ្យទាន់រដូវដាំដុះ និងអនុវត្តន៍បង្ហាញគ្រឿងយន្តកសិកម្ម និងឧបករណ៏កសិកម្ម ស្ថិតនៅភូមិត្រពាំងធ្លក ឃុំស្នំក្រពើ ស្រុកគងពិសី ខេត្តកំពង់ស្ពឺ ។
នាឱកាសសំណេះសំណាលនោះឯកឧត្តម វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ ក៏បានធ្វើការសួរសុខទុក្ខបងប្អូនប្រជាកសិករ ប្រកបទៅដោយភាពរួសរាយរាក់ទាក់ ។ ឯកឧត្តម វេង សាខុន ក៏បានលើកឡើងថាការជួយអន្តរាគមន៍នាពេលនេះ ដែលមានកិច្ចសហការពីក្រុមហ៊ុនឯកជនគឺជាបង្ហាញអោយឃើញពីការយកចិត្តទុកដាក់លើបងប្អូនប្រជាកសិករក្នុងការបង្កបង្កើនផលដើម្បីធានានូវទិន្នផលល្អ ស្របតាមគោលនយោបាយរបស់រាជរដ្ឋាភិបាល ។
ឯកឧត្តម វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ ឯកឧត្តម វ៉ី សំណាង អភិបាល នៃគណៈអភិបាលខេត្តកំពង់ស្ពឺ ក៏បានឆ្លៀតពេលបើរបរត្រាក់ទ័រដើម្បីជួយភ្ជួររាស់ដីស្រែជូនដល់បងប្អូនប្រជាកសិករផងដែរ ។ បន្ថែមពីនេះទៀតឯកឧត្តម វេង សាខុន រដ្ឋមន្ត្រី ក្រសួងកសិកម្មរុក្ខាប្រមាញ់ និងនេសាទ ក៏បានផ្ដល់នូវថវិកាក្នុងម្នាក់ៗចំនួន ១០.០០០ រៀល និងក្រមាម្នាក់ មួយផងដែរ ៕
ប្រភពព័ត៌មាន:រដ្ឋបាលខេត្តកំពង់ស្ពឺ (ថ្ងៃទី ១៣ ខែមិថុនា ឆ្នាំ២០១៨)