រសៀលថ្ងៃច័ន្ទ ៦ រោច ខែជេស្ឋ ឆ្នាំច សំរឹទ្ធិស័ក ព.ស. ២៥៦២ ត្រូវនឹងថ្ងៃ ០៤ ខែមិថុនា ឆ្នាំ ២០១៨ ឯកឧត្តម ពេជ្រ វាសនា អគ្គនាយករងកិច្ចការរដ្ឋបាល និងជានាយកចាត់ចែងគម្រោងការប្រើប្រាស់ធនធានទឹកនៅតាមអាងស្ទឹង (RBWRU) បានដឹកនាំមន្ត្រីបច្ចេកទេស និងមន្ត្រីពាក់ព័ន្ធរបស់គម្រោង ចូលជួបពិភាក្សាការងារជាមួយរដ្ឋបាលខេត្តកំពង់ឆ្នាំង ដឹកនាំដោយឯកឧត្តម ឈួរ ច័ន្ទឌឿន អភិបាលនៃគណអភិបាលខេត្ត នៅសាលាខេត្តកំពង់ឆ្នាំង ។ ជំនួបពិភាក្សានេះ មានគោលបំណងសំខាន់ ដូចខាងក្រោម ៖ ១. ពិភាក្សាលើសេចក្តីព្រាង ស្តីពី ការបង្កើតគណ:កម្មាធិការគ្រប់គ្រងអាងស្ទឹងបំណក់-បរិបូណ៌ ។ ២. ពិនិត្យ និងរៀបចំសមាសភាពគណៈកម្មាធិការគ្រប់គ្រងអាងស្ទឹងបំណក់-បរិបូណ៍ ។ ៣. ពិភាក្សា និងកំណត់ពេលវេលានៃការរៀបចំកិច្ចប្រជុំលើកទី១ របស់គណ:កម្មាធិការគ្រប់គ្រងអាងស្ទឹងបំណក់-បរិបូណ៌ ។ ក្រោយពីបានពិភាក្សា ផ្លាស់ប្តូរយោបល់ និងទទួលបានអនុសាសន៍ពីអ្នកចូលរួម អង្គប្រជុំបានសម្រេចថា គណៈកម្មាធិការគ្រប់គ្រងអាងស្ទឹងបំណក់-បរិបូណ៌ នឹងដឹកនាំដោយអភិបាលខេត្តកំពង់ឆ្នាំង និងអភិបាលខេត្តពោធិ៍សាត់ (សហប្រធាន) ។ ឯលេខាធិការដ្ឋាននៃគណកម្មាធិការគ្រប់គ្រងអាងស្ទឹងបំណក់-បរិបូណ៌ នឹងដឹកនាំដោយអភិបាលរង នៃគណអភិបាលខេត្តទាំងពីរ ។ ចំពោះការរៀបចំកិច្ចប្រជុំដំបូងរបស់គណៈកម្មាធិការខាងលើ នឹងត្រូវរៀបចំឡើងនៅក្នុងខែសីហា ខាងមុខនេះ ។