ថ្ងៃពុធ ៩កើត ខែជេស្ឋ ឆ្នាំចសំរិទ្ធិស័កព.ស២៥៦២ត្រូវនឹងថ្ងៃទី ២៣ ខែ ឧសភា ឆ្នាំ ២០១៨ នៅសាលាស្រុកកំពង់លែង បានរៀបចំកិច្ចប្រជុំផ្សព្វផ្សាយផែនការយុទ្ធនាការប្រយុទ្ធប្រឆាំងគ្រឿងញៀនខុសច្បាប់ លើកទី៣ ឆ្នាំ ២០១៨ ក្រោមអធិតីភាព លោកសំ ចាន់ថន អភិបាលស្រុកកំពង់លែង និងជាប្រធានគណៈបញ្ជាការឯកភាពរដ្ឋបាលស្រុកកំពង់លែង និងលោកឧត្តមសេនីយ៏ត្រី ជុន ថារិទ្ធ ស្នងការរងនគរបាលខេត្ត និងជា អនុប្រធានអចិន្ត្រៃយ៏លេខាធិការដ្ឋានប្រយុទ្ធប្រឆាំងគ្រឿងញៀនខេត្តកំពង់ឆ្នាំង ព្រមទាំងមានការអញ្ជើញចូលរួមពីកងកម្លាំង ក្រុមប្រឹក្សាឃុំ មន្ត្រីជំនាញជំុវិញស្រុក លោកគ្រូ អ្នកគ្រូ លោក លោកស្រីតំណាងក្រុមហ៊ុន អាជីវករក្នុងស្រុកពាក់ព័ន្ធចូលរួមសរុបៈ ៦៦ នាក់ ។ អនុសេនីយ៏ឯក ហាន សុផុន អធិការរងស្រុកបានអានសេចក្តីសម្រេចការបង្កើតគណកម្មការយុទ្ធនាការប្រយុទ្ធប្រឆាំគ្រឿងញៀនថ្នាក់ស្រុក និងអានផែនការលេខ ៣៩ ផ.ក របស់គណកម្មការត្រួតពិនិត្យគ្រឿងញៀនខេត្តកំពង់ឆ្នាំងរួចមកៈ លោក សំ ចាន់ថន អភិបាល និងឧត្តមសេនីយ៏ត្រី ជុន ថារិទ្ធ ស្នងការរង និងជាអនុប្រធានអចិន្ត្រៃយ៏លេខាធិការដ្ឋានប្រយុទ្ធប្រឆាំងគ្រឿងញៀនបានមានមតិសំណេះសំណាល និង ផ្តាំផ្ញើដោយលើកឡើងថាៈ រាជរដ្ឋាភិបាល និងបើកយុទ្ធនាការលើកទី៣ ប្រយុទ្ធប្រឆាំងគ្រឿងញៀនខុសច្បាប់នៅកម្ពុជា ដើម្បីម្ចាស់ការ ការពារ និងលើក កម្ពស់សុខមាលភាពរបស់ប្រជាពលរដ្ឋ ប្រឆាំងទប់ ស្កាត់ចំពោះគ្រោះមហន្តរាយដែលបណ្តាលមកពីឥទ្ធិពលនៃគ្រឿងញៀនខុសច្បាប់សំដៅរក្សាការពាររឹងមាំនូវខឿនសន្តិសុខ សណ្តាប់ធ្នាប់សាធារណៈ និងសុវត្តិភាពសង្គម ។ លោកអភិបាលស្រុក និងលោកឧត្តមសេនីយ៏ត្រី ក៏បានចាប់អារម្មណ៏នូវផលប៉ះពាល់ដោយផ្ទាល់ និងដោយប្រយោល ជាពិសេស សកម្មភាពចរាចរ ជួញដូរ និងប្រើប្រាស់គ្រឿងញៀនខុសច្បាប់ដែលហាក់កំពុងមានការរីករាលដាលគួរឲ្យព្រួយបារម្ភក្នុស្រទាប់យុវវ័យតែម្តង ដែលធ្វើឲ្យមានការប៉ះពាល់ដល់ ខ្លួនឯងផង គ្រួសារផង និងសង្គមជាតិផង ៕ ប្រភពព័ត៌មាន: រដ្ឋបាលខេត្តកំពង់ឆ្នាំង (ថ្ងៃទី២៤ ខែឧសភា ឆ្នាំ២០១៨)