ក្រោមការយកចិត្តទុកដាក់ របស់ថ្នាក់ដឹកនាំខេត្ត ចំពោះសុខទុក្ខរបស់ក្រុមគ្រូពេទ្យយោធភូមិភាគ២ និងក្រុមគ្រូពេទ្យនៃកងវិស្វកម្មក្រសួងការពារជាតិ ដែលកំពុងបំពេញបេសកកម្មចាក់វ៉ាក់សាំងបង្ការជំងឺកូវីដ-១៩ ជូនដល់ប្រជាពលរដ្ឋមានអាយុ១៨ឆ្នាំឡើង នៅស្រុកជើងព្រៃ និងស្រុកបាធាយ នៅថ្ងៃទី២៣ ខែកក្កដា ឆ្នាំ២០២១នេះ ឯកឧត្ដម អ៊ុន ចាន់ដា អភិបាលខេត្ត និងជាប្រធានគណៈកម្មការខេត្តប្រយុទ្ធនឹងជម្ងឺកូវីដ-១៩ អមដំណើរដោយឯកឧត្តមអភិបាលរងខេត្ត និងអាជ្ញាធរមូលដ្ឋាន បានអញ្ជើញសួរសុខទុក្ខក្រុមគ្រូពេទ្យ និងនាំយកអំណោយរបស់រដ្ឋបាលខេត្ត ជូនក្រុមគ្រូពេទ្យដែលកំពុងបំពេញបេសកកម្ម ចាក់វ៉ាក់សាំងបង្ការជម្ងឺកូវីដ-១៩ ជូនដល់ប្រជាពលរដ្ឋមានអាយុ១៨ឆ្នាំឡើង នៅក្នុងស្រុកជើងព្រៃ និងស្រុកបាធាយ។
ឆ្លៀតក្នុងឱកាសនោះឯកឧត្តម អ៊ុន ចាន់ដា អភិបាលខេត្ត ក៏បានពាំនាំប្រសាសន៍ផ្ដាំផ្ញើការសាកសួរសុខទុក្ខពីសំណាក់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជូន
ចំពោះក្រុមការងារ គ្រូពេទ្យ បងប្អូនប្រជាពលរដ្ឋ និងកម្មករ កម្មការនី ដែលបានអញ្ជើញមកធ្វើការចាក់វ៉ាក់សាំងដូសទី២ ដើម្បីការពារជំងឺកូវីដ-១៩ នៅក្នុងស្រុកជើងព្រៃ និងស្រុកបាធាយ ខេត្តកំពង់ចាម ដែលជានិច្ចកាល សម្តេចទាំងពីរ តែងតែយកចិត្តទុកដាក់ចំពោះសុខភាពរបស់បងប្អូន ដោយធ្វើយ៉ាងណាឱ្យជៀសផុតជំងឺដ៏កាចសាហាវនេះ ជាមួយគ្នានេះ រាជរដ្ឋាភិបាល បានខិតខំគ្រប់មធ្យោបាយទប់ស្កាត់ការឆ្លងរីករាលដាលនៃជំងឺកូវីដ-១៩នេះ រួមទាំងខិតខំស្វែងរកវ៉ាក់សាំងបង្កាជំងឺកូវីដ-១៩ ចាក់ជូនបងប្អូនប្រជាពលរដ្ឋ ដោយឥតគិតថ្លៃ សំដៅបង្កើតភាពសុំា ក្នុងការបង្កា និងការពារជំងឺដ៏កាចសាហាវនេះ។ ឯកឧត្តម ក៏បានធ្វើការផ្តាំផ្ញើដល់បងប្អូនប្រជាពលរដ្ឋ ដែលត្រូវមកទទួលវ៉ាក់សាំងការពារជំងឺកូវីដ-១៩ដូសទី២នេះ ត្រូវអោយបានគ្រប់ចំនួនថ្ងៃតាមគោលការណ៍ណែនាំរបស់ក្រសួងសុខាភិបាល ដើម្បីប្រសិទ្ធភាពនៃវ៉ាក់សាំង។
ជាមួយគ្នានេះ បើទោះបីជាបងប្អូនប្រជាពលរដ្ឋ បានចាក់់វ៉ាក់សាំងការពារជំងឺកូវីដ-១៩ រួចហើយកពិតមែន ប៉ុន្តែយើងត្រូវបន្តបង្កើនការប្រុងប្រយ័ត្នថែមទៀត ដោយអនុវត្តនូវវិធានការ «៣ការពារ និង ៣កុំ» ពាក់ម៉ាស់ ការលាងសម្អាតដៃ ការរក្សាគម្លាត និងរក្សាអនាម័យតាមការណែនាំរបស់ក្រសួងសុខាភិបាលដើម្បីជៀសផុតពីការឆ្លងមេរោគកូវីដ-១៩។
គួរបញ្ជាក់ថា អំណោយ ដែលឯកឧត្ដមអភិបាលខេត្ត នាំយកចែកជូនក្រុមគ្រូពេទ្យទាំង ២ស្រុក ខាងលើ ក្នុងមួយស្រុកទទួលបាន ៖ អង្ករ ចំនួន ២០០គីឡូក្រាម ម៉ាស់ ចំនួន ១០.០០០ម៉ាស់ មីចំនួន ២០កេស អាល់កុល ចំនួន ០៣កេស ជែលលាងដៃ ចំនួន ០៥កេស និងទឹកសុទ្ធ ចំនួន ២០កេស និងថវិកា ៥លានរៀល៕
ប្រភព៖ រដ្ឋបាលខេត្តកំពង់ចាម