នៅល្ងាចថ្ងៃពុធ ៩កើត ខែជេស្ឋ ឆ្នាំច សរឹទ្ធិស័ក ព.ស២៥៦២ ត្រូវនឹងថ្ងៃទី២៣ ខែឧសភា ឆ្នាំ២០១៨ នៅសាលាខេត្តកំពង់ឆ្នាំង បានរៀបចំពិធីបិទវគ្គសិក្ខាសាលាសាកល្បងឆ្លើយតបបន្ទាន់គ្រោះអាសន្នកម្ពុជា ថ្នាក់ក្រោមជាតិ ក្រោមអធិបតីភាព ឯកឧត្តម អៀង វុធ អភិបាលរងខេត្តកំពង់ឆ្នាំង និងលោកខៀវ ចាន់ធាវី ប្រធានតំបន់អង្គការស្បៀងអាហាពិភពលោក និងមានការចូលរួមពីសិក្ខាកាមថ្នាក់ខេត្ត ក្រុង ស្រុក និងបុគ្គលិកអង្គការWFP សរុប៥១នាក់។ ឆ្លៀតក្នុងឱកាសនេះដែរ ឯកឧត្តម អភិបាលរងខេត្ត ក៏បានផ្ដាំផ្ញើដល់អាជ្ញាធរក្រុង ស្រុក មន្ទីរ អង្គភាពពាក់ព័ន្ធជុំវិញខេត្ត និងអ្នកពាក់ព័ន្ធទាំងអស់ សូមយកចំណេះដឹងដែលទទួលបានពីលំហាត់សាកល្បងនេះ ទៅអនុវត្តក្នុងការងារជាក់ស្ដែងរបស់ខ្លួន ទៅតាមជំហាន និងវិធីសាស្ត្រដែលបានពន្យល់ណែនាំដោយគ្រូសម្របសម្រួល។ ខ្ញុំក៏សូមផ្ដាំផ្ញើផងដែរដល់លោក លោកស្រីដែលទទួលគ្រប់គ្រងទូរស័ព្ទ Tablet សម្រាប់ប្រមូលព័ត៌មាន សូមប្រើប្រាស់ និងថែរក្សាឧបករណ៍ទាំងនោះឲ្យបានគង់វង្សយូរអង្វែង និងត្រូវបង្កើនការប្រុងប្រយ័ត្ន និងត្រៀមលក្ខណៈឲ្យបានរួចរាល់នៅមុនពេលមានគ្រោះមហន្តរាយកើតឡើង ហើយត្រូវភ្ជាប់ទំនាក់ទំនងជាប្រចាំជាមួយក្រុមលេខាធិការដ្ឋានគណៈកម្មាធិការគ្រប់គ្រងគ្រោះមហន្តរាយខេត្ត ដើម្បីតាមដានពីការវិវត្តនៃសភាពការណ៍គ្រោះមហន្តរាយ ក៏ដូចជាចែករំលែកព័ត៌មានបន្ទាន់នានា។ នៅទីបញ្ចប់ ឯកឧត្តមបានថ្លែងថា ក្នុងនាមថ្នាក់ដឹកនាំខេត្ត និងក្នុងនាមខ្លួនខ្ញុំផ្ទាល់ ខ្ញុំសូមថ្លែងនូវអំណរគុណយ៉ាងជ្រាលជ្រៅចំពោះ អស់លោក លោកស្រីទាំងអស់ ដែលបានចំណាយពេលវេលាដ៏មមាញឹក ចូលរួមលំហាត់សាកល្បងរយៈពេល២ថ្ងៃនេះ និងសូមថ្លែងអំណរគុណយ៉ាងជ្រាលជ្រៅជូនចំពោះកម្មវិធីស្បៀងអាហារពិភពលោក ដែលបានឧបត្ថម្ភគាំទ្រដល់ដំណើរការរៀបចំលំហាត់សាកល្បងនេះ និងសូមគោរពជូនពរលោក លោកស្រី សូមទទួលបាននូវពុទ្ធពរទាំងបួនប្រការគឺ អាយុ វណ្ណៈ សុខៈ និងពលៈ កុំបីឃ្លាងឃ្លាតឡើយ៕ ប្រភពព័ត៌មាន: រដ្ឋបាលកំពង់ឆ្នាំង (ថ្ងៃទី២៣ ខែឧសភា ឆ្នាំ២០១៨)
