នៅសាលប្រជុំសាលាខេត្តរតនគិរី នារសៀលថ្ងៃទី១៨ ខែឧសភា ឆ្នាំ២០១៨ បានរៀបចំពិធីប្រកាសចូលកាន់មុខតំណែងអភិបាលរងខេត្តចំនួន ០១រូប ដែលពិធីនេះធ្វើឡើងក្រោមអធិបតីភាពឯកឧត្តម សក់ សេដ្ឋា រដ្ឋលេខាធិការក្រសួងមហាផ្ទៃ តំណាងដ៏ខ្ពង់ខ្ពស់សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ។ លោក មួង ប៉ាង អភិបាលស្រុកតាវែង ត្រូវបានរាជរដ្ឋាភិបាលកម្ពុជា តែងតាំងជាអភិបាលរងខេត្តរតនគិរី ជំនួសឯកឧត្តម លី វិន្ទ អភិបាលរងខេត្ត ដែលត្រូវចូលនិវត្តន៍ និងដើម្បីបំពេញក្នុងរចនាសម្ព័ន្ធជួរគណៈអភិបាលខេត្ត ដែលចែងក្នុងច្បាប់ស្តីពីការគ្រប់គ្រងរដ្ឋបាលរាជធានី ខេត្ត ក្រុង ស្រុក ខណ្ឌ ។ ឯកឧត្តម សក់ សេដ្ឋា រដ្ឋលេខាធិការក្រសួងមហាផ្ទៃ ថ្លែងនូវការកោតសរសើរចំពោះអាជ្ញាធរខេត្ត កងកម្លាំងប្រដាប់អាវុធ មន្ត្រីរាជការ ដែលបានចូលរួមចំណែកនូវក្នុងការរក្សាស្ថេរភាព និងជំរុញកំណើនសេដ្ឋកិច្ចជាតិ រក្សាបាននូវអត្រាកំណើនសេដ្ឋកិច្ចក្នុងចន្លោះ ៧% ។ ឯកឧត្តមបានផ្តាំផ្ញើដល់គណៈអភិបាលខេត្ត ក្រុង ស្រុក ព្រមទាំងមន្ត្រីរាជការទាំងអស់ក្នុងខេត្ត ត្រូវពង្រឹងការងារផ្តល់សេវាជូនប្រជាពលរដ្ឋឲ្យបានល្អប្រសើរ ប្រកបដោយគុណភាព ប្រសិទ្ធិភាព និងស្នាមញញឹម អនុវត្តឲ្យបាននូវគោលនយោបាយយុទ្ធសាស្ត្ររបស់រាជរដ្ឋាភិបាលកម្ពុជា ។ ទន្ទឹមនឹងនេះត្រូវរួមគ្នារក្សាស្ថេរភាព ប្រទេស ក្នុងគោលដៅជំរុញកំណើនសេដ្ឋកិច្ច ដោយអនុវត្តវិធានការច្បាប់ចំពោះជនទាំងឡាយណាដែលបង្ករអស្ថេរភាពសង្គម ប៉ះពាល់ដល់សន្តិសុខជាតិ ។ ពង្រឹងការគ្រប់គ្រងបញ្ហាគ្រឿងញៀន ទាំងវិធានការអប់រំ វិធានការរដ្ឋបាល និងវិធានការត្រួតពិនិត្យ ត្រូវអនុវត្តឲ្យបានជាប់ជាប្រចាំ ពង្រឹងការអនុវត្តច្បាប់ចរាចរណ៍ ពង្រឹងការងារគ្រប់គ្រងនៅតាមខ្សែបន្ទាត់ព្រំដែន និងជំរុញការអនុវត្តគោលនយោបាយកំណែទម្រង់ ដែលរដ្ឋាភិបាលដាក់ចេញ។ ប្រភពព័ត៌មាន: រដ្ឋបាលខេត្តរតនគិរី (ថ្ងៃទី១៨ ខែឧសភា ឆ្នាំ២០១៨)
