ថ្ងៃសុក្រ ៤ កើត ខែជេស្ឋ ឆ្នាំច សំរឹទ្ធិស័ក ពុទ្ធសករាជ ២៥៦២ ត្រូវនឹងថ្ងៃទី១៨ ខែឧសភា ឆ្នាំ២០១៨ លោកជំទាវ មិថុនា ភូថង អភិបាល នៃគណៈអភិបាលខេត្តកោះកុង បានអញ្ជើញជាអធិបតី អបអរសាទរខួបលើកទី១១ ទិវាអតីតយុទ្ធជនកម្ពុជា (២១ មិថុនា ២០០៧-២១ មិថុនា ២០១៨) ដោយមានការចូលរួមពី លោក លោកស្រី ប្រធាន អនុប្រធានមន្ទីរ អង្គភាពនានាជុំវិញខេត្ត លោកអភិបាលក្រុង ស្រុក និងអតីតយុទ្ធជន។លោកជំទាវ អភិបាលខេត្ត បានលើកឡើងថា ជានិច្ចជាកាលរាជរដ្ឋាភិបាល តែងចាត់ទុកស្មារតី នៃការតស៊ូដ៏អង់អាចក្លាហាន និងពលិកម្មដ៏ស្មោះស្ម័គ្រ របស់អតីតយុទ្ធជនកម្ពុជា ដើម្បីបុព្វហេតុជាតិមាតុភូមិ គឺជាគម្រូវីរភាពស្នេហាជាតិដ៏ឧត្តុងឧត្តម និងជាគុណបំណាច់ដ៏ធំធេង ដែលបានកត់ត្រាក្នុងប្រវត្តិសាស្ត្រជាតិ។ វីរភាព នឹងគុណបំណាច់របស់អតីតយុទ្ធជន បានបំផុសចលនាគាំទ្រអតីតយុទ្ធជន លើកកម្ពស់ និងជម្រុញស្មារតីស្នេហាជាតិ ក្នុងស្រទាប់ប្រជាជន កងកម្លាំប្រដាប់អាវុធ ជាពិសេសស្រទាប់យុវជន ដើម្បីប្រែក្លាយយុវជន អោយស័ក្តិសម ជាសរសរទ្រូង និងជាអ្នកបន្តវេនប្រកបដោយឧត្តមគតិមោះមុតរឹងមាំ និងមានសេចក្តីថ្លៃថ្នូរ ព្រមទាំងចូលរួមកសាង អភិវឌ្ឍប្រទេសជាតិ អោយកាន់តែរីកចម្រើនថែមទៀត៕ ប្រភពព័ត៌មាន: រដ្ឋបាលខេត្តកោះកុង ( ថ្ងៃទី ១៨ ខែឧសភា ឆ្នាំ២០១៨)