នាព្រឹកថ្ងៃពុធ ២កើត ខែជេស្ឋ ឆ្នាំច សំរឹទ្ឋិស័ក ព.ស២៥៦២ ត្រូវនឹងថ្ងៃទី១៦ ខែឧសភា ឆ្នាំ២០១៨ សាខាកាកបាទ ក្រហមកម្ពុជាខេត្តកំពង់ស្ពឺ សហការជាមួយរដ្ឋបាលខេត្ត បានរៀបចំប្រារព្ធខួបលើកទី១៥៥ ទិវាពិភពលោក កាកបាទក្រហម អឌ្ឍចន្ទក្រហម ៨ ឧសភា ២០១៨ ក្រោមប្រធានបទ «កាកបាទក្រហមកម្ពុជាមានគ្រប់ទីកន្លែងសម្រាប់គ្រប់ៗគ្នា មិនទុកនរណាម្នាក់ចោល» ក្រោមអធិបតីភាពដ៏ខ្ពង់ខ្ពស់ឯកឧត្តម ហ៊ុន ម៉ានី អ្នកតំណាងរាស្ត្រមណ្ឌលកំពង់ស្ពឺ ។
ក្នុងពិធីដ៏មានអត្ថន័យនេះក៏មានការអញ្ជើញចូលរួមពី សំណាក់ ឯកឧត្តម លោកជំទាវ ថ្នាក់ដឹកនាំខេត្ត មន្ត្រីរាជការ និងអាជីវករដែលជាម្ចាស់សហគ្រាស ក្រុមហ៊ុន និងធុរកិច្ចក្នុងខេត្តកំពង់ស្ពឺបានចូលរួមយ៉ាងច្រើនកុះករ និងបានចូលរួមយ៉ាងធំធេងទាំងធនធានថវិកា និងធនធានសម្ភារ រហូតធ្វើឲ្យការប្រមូលមូលនិធិបានយ៉ាងច្រើនសម្រាប់សាខាកាកបាទក្រហមកម្ពុជាខេត្តកំពង់ស្ពឺ ដើម្បីទុក្ខប្រើប្រាស់សម្រាប់ជាប្រយោជន៍ដល់ជនក្រីក្រ និងជនងាយរងគ្រោះ ព្រមទាំងជួយដល់ ប្រជាពលរដ្ឋនៅក្នុងខេត្តដែលជួបប្រទះនូវគ្រោះមហន្តរាយផ្សេងៗនៅក្នុងខេត្តកំពង់ស្ពឺ។
យោងតាមរបាយការណ៍របស់លោក អោ វណ្ណថេន ប្រធានមន្ទីរសុខាភិបាលខេត្ត និងជាអនុប្រធានសាខាកាកបាទក្រហមកម្ពុជាខេត្ដកំពង់ស្ពឺ បានរាយការណ៍ថា នៅក្នុងឆ្នាំ២០១៧ និងត្រីមាសទី១ ឆ្នាំ២០១៨កន្លងមកនេះ មូលនិធិកាកបាទក្រហមកម្ពុជាបានចូលរួមចំណែក យ៉ាងធំធេងក្នុងកិច្ចការងារមនុស្សធម៌ដោយមិនប្រជាកាន់ជាតិសាសន៍ សាសនា និងនិន្នាកានយោបាយឡើយ តាមរយៈអំណោយសង្គ្រោះនានារបស់ខ្លួន៕
ប្រភពព័ត៌មាន: រដ្ឋបាលខេត្តកំពង់ស្ពឺ (ថ្ងៃទី១៦ ខែឧសភា ឆ្នាំ២០១៨)