នាព្រឹកថ្ងៃចន្ទ ១៥រោច ខែពិសាខ ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី១៤ ខែឧសភា ឆ្នាំ២០១៨ នៅឃុំខ្ពប ស្រុកស្អាង ខេត្តកណ្តាល មានរៀបចំពិធីបើកការដ្ឋានសាងសង់ផ្លូវបេតុងអាមេប្រវែង ២០០០ម៉ែត្រ ទទឹង ៥ម៉ែត្រ កម្រាស់ ០,១៥ម៉ែត្រ ដែលពិធីនេះប្រព្រឹត្តទៅក្រោមអធិបតីភាព ឯឧបណ្ឌិត ម៉ៅ ភិរុណ អភិបាលនៃគណ:អភិបាលខេត្តកណ្តាល។ ពិធីនេះផងដែរក៏មានការអញ្ជើញចូលរួមពីសំណាក់ ឯកឧត្តម លោកជំទាវ សមាជិក សមាជិកា ក្រុមប្រឹក្សាខេត្ត អភិបាលរងខេត្ត ប្រធាន អនុប្រធានមន្ទីរ ជុំវិញខេត្ត, មន្ត្រីរាជការ កងកម្លាំងជុំវិញខេត្ត និងស្រុក មេឃុំ មន្ត្រីពាក់ព័ន្ធ និងប្រជាពលរដ្ឋនៃឃុំថ្មគរនិងឃុំទឹកឃ្លាំង សរុបចំនួន ៥៦៩ នាក់។ *នៅក្នុងឱកាសនោះ ឯឧ អភិបាលខេត្ត បានជម្រាបជូនបងប្អូនប្រជាពលរដ្ឋ និងអ្នកចូលរួម ពីសមិទ្ធផលនានា និងការរីកចម្រើនរបស់ប្រទេសជាតិ រួមមាន កំណើននៃទេសចរទាំងក្នុងស្រុក និងក្រៅស្រុក ការផ្តល់ទីផ្សារការងារដល់ប្រជាពលរដ្ឋ ការកៀគរធនធានសម្រាប់កសាង វត្តអារាម សាលារៀន មន្ទីរពេទ្យ មណ្ឌលសុខភាព ផ្លូវកៅស៊ូ ផ្លូវបេតុង តូចធំ វែងខ្លី ស្ពានតូចធំ ស្ពានវែងខ្លី ដែលបានកើតឡើងព្រោងព្រាតក្នុងភូមិសាស្ត្រខេត្តកណ្តាល និងស្រុកស្អាង នៅក្នុងរយ:ពេលប៉ុន្មានឆ្នាំចុងក្រោយនេះ ដែលការរីកចម្រើនទាំងនេះ គឺកើតឡើងដោយសារប្រទេសជាតិយើងមានសុខសន្តិភាព ស្ថិរភាពនយោបាយ ជាពិសេសគឺមានការដឹកនាំដ៏ត្រឹមត្រូវរបស់សម្តេចអគ្គមហាសេនាបតីតេជោ ហ៊ុនសែន នាយករដ្ឋមន្ត្រីនៃព្រះរាជាណាចក្រកម្ពុជា ។ *ជាមួយគ្នានេះដែរ ឯកឧត្តមក៏បានណែនាំដល់ក្រុមហ៊ុនទទួលការ និងអាជ្ញាធរដែនដី ក៏ដូចជាប្រជាពលរដ្ឋ ដូចខាងក្រោម៖ + ផ្តាំផ្ញើដល់ក្រុមហ៊ុនសាងសង់ផ្លូវ ត្រូវគោរព និងអនុវត្តឲ្យបានត្រឹមត្រូវតាម បទដ្ឋានបច្ចេកទេស ធានានូវគុណភាព។ +ណែនាំអោយអាជ្ញាធរដែនដី និងកងកម្លាំង ត្រូវខិតខំថែរក្សា សន្តិសុខ សណ្តាប់ធ្នាប់ សាធារណ: និងការផ្តល់សេវាសាធារណ: ជូនប្រជាពលរដ្ឋឱ្យកាន់តែល្អប្រសើរ ពិសេសខិតខំលុបបំបាត់ល្បែងសុីសង អំពើលួចឆក់ប្លន់ គ្រឿងញៀន។ +ត្រូវអំពាវនាវឱ្យបងប្អូនទាំងអស់ត្រូវចូលរួមថែរក្សាសន្តិភាពអោយបានស្ថិតស្ថេរ និងត្រូវទៅចូលរួមបោះឆ្នោតជ្រើសតំណាងរាស្ត្រនីតិកាលទី៦ នៃរដ្ឋសភា នាថ្ងៃទី២៩ ខែកក្កដា ឆ្នាំ២០១៨ អោយបានគ្រប់ៗគ្នា ដើម្បីការពារសន្តិភាពដែលយើងមានរួចហើយ និងដើម្បីអភិវឌ្ឍន៍ភូមិ ឃុំ របស់យើងឱ្យមានការរីកចម្រើនជាបន្តបន្ទាប់ទៅទៀត។ សូមបញ្ជាក់ថា ៖ ឃុំខ្ពប នៃស្រុកស្អាង ខេត្តកណ្តាល ស្ថិតនៅតាមបណ្ដោយដងទន្លេបាសាក់ផ្នែកខាងកើតទន្លេ តាមបណ្ដោយផ្លូវជាតិលេខ១១០ មានចម្ងាយប្រមាណ ១៣គីឡូម៉ែត្រ ពីសាលាស្រុកស្អាង មានព្រំប្រទល់ ខាងកើតទល់នឹង ឃុំ តាលន់ និងឃុំប្រាសាទ ស្រុកស្អាង , ខាងលិចទល់នឹងទន្លេបាសាក់ , ខាងជើងទល់នឹង ឃុំតាលន់ ស្រុកស្អាង , ខាងត្បូងទល់នឹងភូមិព្រែកម្រេញ ឃុំពោធិបាន ស្រុកកោះធំ ។ ឃុំខ្ពបមានផ្ទៃដីសរុប ៣.៣២១ ហិចតា ចែកចេញជា១០ភូមិ មានភូមិឫស្សីស្រុក , ភូមិខ្ពបលើ , ភូមិខ្ពបក្រោម , ភូមិរការលើ , ភូមិរកាក្រោម , ភូមិកោះថ្មី , ភូមិបឹងខ្ពប , ភូមិដំរីឆ្លង , ភូមិព្រៃទទឹង និងភូមិត្នោតញី ។ ក្នុងនោះមានគ្រួសារសរុប ២.៨២៥គ្រួសារ មានប្រជាពលរដ្ឋសរុប ១២.៦៧០ នាក់ ស្រី៦.៥៤០ នាក់ ប្រជាពលរដ្ឋអាយុ ១៨ឆ្នាំឡើងមានចំនួន ៨.២២៨ នាក់ ស្រី ៤.៣៤៤ នាក់ ។ *ក្នុងឱកាសនោះដែរ ឯ.ឧ អភិបាលខេត្ត បានឧបត្ថម្ភ ប្រជាពលរដ្ឋអញ្ជើញចូលរួមចំនួន ៥០០នាក់ ក្នុងម្នាក់ៗទទួលបានថវិកា ចំនួន ១ មុឺនរៀល។ ប្រភពព័ត៌មាន: រដ្ឋបាលខេត្តកណ្តាល (ថ្ងៃទី១៤ ខែឧសភា ឆ្នាំ២០១៨)