នៅព្រឹកថ្ងៃពុធ ១០រោច ខែពិសាខ ឆ្នាំច សំរឹទ្ធិស័ក ព.ស២៥៦២ ត្រូវនឹងថ្ងៃទី៩ ខែឧសភា ឆ្នាំ២០១៨ខេត្តកំពង់ឆ្នាំង បានរៀបចំកិច្ចប្រជុំផ្សព្វផ្សាយច្បាប់ស្ដីពីសមាគម និងអង្គការមិនមែនរដ្ឋាភិបាល ច្បាប់ស្ដីពីគណបក្សនយោបាយ និងលិខិតបទដ្ឋានពាក់ព័ន្ធ។ ពិធីផ្សព្វផ្សាយនេះធ្វើឡើងនៅក្នុងកិច្ចប្រជុំគណៈបញ្ជាការឯកភាពរដ្ឋបាលខេត្តក្រោមអធិបតីភាពឯកឧត្ដម ឈួរ ច័ន្ទឌឿន អភិបាលខេត្តកំពង់ឆ្នាំង និងមានការចូលរួមពីឯកឧត្តម អភិបាលរងខេត្ត នាយករដ្ឋបាលសាលាខេត្ត កងកម្លាំងទាំងបីប្រភេទ អភិបាលក្រុង ស្រុក មន្ទីរអង្គភាពជុំវិញខេត្ត នាយកទីចាត់ការ និងប្រធានអង្គភាពសាលាខេត្ត។ ឆ្លៀតក្នុងឱកាសនោះ ឯកឧត្តម អម សុភា អភិបាលរងខេត្ត បានលើកឡើងថា៖ គោលបំណងនៃការបង្កើតវេទិកាសម្ព័ន្ធអង្គការសង្គមស៊ីវិល(វ.ស.ស)មានពីរចំណុចសំខាន់ៗ គឺពង្រឹងភាពជាម្ចាស់ការ និងរក្សាសន្ដិភាព។ លោកអ៊ុន សុផល នាយករដ្ឋបាលសាលាខេត្តបានធ្វើបទបង្ហាញដោយសង្ខេបស្ដីពីច្បាប់សមាគម និងអង្គការមិនមែនរដ្ឋាភិបាល និងច្បាប់ស្ដីពីគណបក្សនយោបាយ។ កិច្ចបន្ទាប់ ឯកឧត្តម ស៊ុន សុវណ្ណារិទ្ធអភិបាលរងខេត្ត បានធ្វើបទបង្ហាញលិខិតបទដ្ឋានពាក់ព័ន្ធនានារួមមាន៖
១.សេចក្ដីជូនដំណឹងលេខ១៧៥៣ សជណ ចុះថ្ងៃទី០២ ខែតុលា ឆ្នាំ២០១៧ របស់ក្រសួងមហាផ្ទៃស្ដីពីការធ្វើសកម្មភាពរបស់សមាគម និងអង្គការមិនមែនរដ្ឋាភិបាលក្នុងស្រុក
២. សេចក្ដីជូនដំណឹងលេខ៧០៥ សជណ ចុះថ្ងៃពុធ ១១កើត ខែពិសាខ ឆ្នាំច សំរឹទ្ធិស័ក ព.ស២៥៦១ ត្រូវនឹងថ្ងៃទី២៥ ខែមេសា ឆ្នាំ២០១៨ របស់ក្រសួងមហាផ្ទៃស្ដីពីការបង្កលក្ខណៈងាយស្រួលដល់ការចុះបញ្ជីគណបក្សនយោបាយ និងបេក្ខជនឈរឈ្មោះបោះឆ្នោតជ្រើសតាំងតំណាងរាស្ត្រនីតិកាលទី៦ ឆ្នាំ២០១៨
៣. ប្រកាសរួមស្ដីពីអាករចុះបញ្ជីគណបក្សនយោបាយ
៤.សេចក្ដីជូនដំណឹងស្ដីពីការរំលឹកចំពោះសមាគម និងអង្គការមិនមែនរដ្ឋាភិបាលក្នុងស្រុកដែលខកខានមិនបានបំពេញកាតព្វកិច្ចតាមការកំណត់ដោយច្បាប់
៥. សេចក្ដីជូនដំណឹងស្ដីពីការបំពេញកាតព្វកិច្ចរបស់សមាគម និងអង្គការមិនមែនរដ្ឋាភិបាលក្នុងស្រុក
៦. សេចក្ដីជូនដំណឹងលេខ២៥៩សជណ ចុះថ្ងៃពុធ ៧រោច ខែមាឃ ឆ្នាំរកា នព្វស័ក ព.ស២៥៦១ ត្រូវនឹងថ្ងៃទី១៧ ខែកុម្ភៈ ឆ្នាំ២០១៨របស់ក្រសួងមហាផ្ទៃស្ដីពីការបង្កលក្ខណៈឲ្យគណបក្សនយោបាយធ្វើសកម្មភាព ដើម្បីចូលរួមក្នុងការបោះឆ្នោតជ្រើសតាំងតំណាងរាស្ត្រ អាណត្តិទី៦ ឆ្នាំ២០១៨ និង
៧. បញ្ជីឈ្មោះគណបក្សនយោបាយ ដែលបានចុះបញ្ជីឈ្មោះគណបក្សនៅក្រសួងមហាផ្ទៃ ស្របតាមច្បាប់ស្ដីពីគណបក្សនយោបាយ គិតត្រឹមថ្ងៃចន្ទ ៨រោច ខែពិសាខ ឆ្នាំច សំរឹទ្ធិស័ក ព.ស២៥៦២ ត្រូវនឹងថ្ងៃទី០៧ ខែឧសភា ឆ្នាំ២០១៨ គឺមានចំនួន៣៨គណបក្សនយោបាយ។
ប្រភពព័ត៌មាន: រដ្ឋបាលខេត្តកំពង់ឆ្នាំង (ថ្ងៃទី០៩ ខែឧសភា ឆ្នាំ២០១៨)