នាព្រឹកថ្ងៃអាទិត្យ ៧រោច ខែពិសាខ ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី០៦ ខែឧសភា ឆ្នាំ២០១៨ នៅឃុំទឹកឃ្លាំង ស្រុកល្វាឯម ខេត្តកណ្តាល មានរៀបចំពិធីបើកការដ្ឋានសាងសង់ផ្លូវបេតុងអាមេប្រវែង ២១៧០ ម៉ែត្រ និងផ្លូវក្រួសក្រហមប្រវែង៣៩០០ម៉ែត្រ ដែលពិធីនេះប្រព្រឹត្តទៅក្រោមអធិបតីភាព ឯឧ កែ បេងវឌ្ឍន៍ ប្រតិភូរាជរដ្ឋាភិបាលទទួលបន្ទុកជាអគ្គនាយកនៃអគ្គនាយកដ្ឋានរដ្ឋបាល ហិរញ្ញវត្ថុ ថ្នាក់ក្រោមជាតិ និង ឯឧបណ្ឌិត ម៉ៅ ភិរុណ អភិបាលនៃគណ:អភិបាលខេត្តកណ្តាល។ ពិធីនេះផងដែរក៏មានការអញ្ជើញចូលរួមពីសំណាក់ ឯឧ លោកជំទាវ ប្រតិភូអមដំណើរឯឧប្រតិភូ ឯកឧត្តម លោកជំទាវ សមាជិក សមាជិកា ក្រុមប្រឹក្សាខេត្ត អភិបាលរងខេត្ត ប្រធាន អនុប្រធានមន្ទីរ ជុំវិញខេត្ត, មន្ត្រីរាជការ កងកម្លាំងជុំវិញខេត្ត និងស្រុក មេឃុំ មន្ត្រីពាក់ព័ន្ធ និងប្រជាពលរដ្ឋនៃឃុំថ្មគរនិងឃុំទឹកឃ្លាំង សរុបជាង ៥០០ នាក់។
*ឯកឧត្តម កែ បេងវឌ្ឍន៍ បានជម្រាបជូនប្រជាពលរដ្ឋពីការខិតខំប្រឹងប្រែងរបស់រាជរដ្ឋាភិបាលកម្ពុជា និងក្រុមការងារថ្នាក់ជាតិចុះជួយខេត្ត ស្រុក ឃុំ ដែលបានជួយអភិវឌ្ឍន៍ ប្រទេសជាតិ និងមូលដ្ឋានយើងឱ្យមានការរីកចម្រើនជាបន្តបន្ទាប់ រហូតមកដល់សព្វថ្ងៃ ។ ម្យ៉ាងទៀត ឯឧ ក៏បានសំណូមពរឱ្យបងប្អូនប្រជាពលរដ្ឋបន្តថែរក្សាសន្តិភាពដែលយើងកំពុងមាន ដើម្បីឱ្យប្រទេសជាតិយើងមានការអភិវឌ្ឍន៍ទៅមុខទៀត។
*នៅក្នុងឱកាសនោះ ឯកឧត្តម អភិបាលខេត្ត បានជម្រាបជូនបងប្អូនប្រជាពលរដ្ឋ និងអ្នកចូលរួម ពីសមិទ្ធផលនានា និងការរីកចម្រើនរបស់ប្រទេសជាតិ និយាយជារួម និងនិយាយដោយឡែក គឺសមិទ្ធផលនានា រួមមាន វត្តអារាម សាលារៀន មន្ទីរពេទ្យ មណ្ឌលសុខភាព ផ្លូវកៅស៊ូ ផ្លូវបេតុង តូចធំ វែងខ្លី ស្ពានតូចធំ ស្ពានវែងខ្លី បានកើតឡើងព្រោងព្រាតក្នុងភូមិសាស្ត្រខេត្តកណ្តាល និងល្វាឯម នៅក្នុងរយ:ពេលប៉ុន្មានឆ្នាំចុងក្រោយនេះ ដែលការរីកចម្រើនទាំងនេះ គឺកើតឡើងដោយសារប្រទេសជាតិយើងមានសុខសន្តិភាព ស្ថិរភាពនយោបាយ ជាពិសេសគឺមានការដឹកនាំដ៏ត្រឹមត្រូវរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ។ *ជាមួយគ្នានេះដែរ ឯកឧត្តមក៏បានណែនាំដល់អាជ្ញាធរដែនដី ក៏ដូចជាប្រជាពលរដ្ឋ ដូចខាងក្រោម៖
+ណែនាំអោយអាជ្ញាធរដែនដី និងកងកម្លាំង ត្រូវខិតខំថែរក្សា សន្តិសុខ សណ្តាប់ធ្នាប់ សាធារណ: និងការផ្តល់សេវាសាធារណ: ជូនប្រជាពលរដ្ឋឱ្យកាន់តែល្អប្រសើរ។
+ត្រូវអំពាវនាវឱ្យបងប្អូនទាំងអស់ត្រូវចូលរួមថែរក្សាសន្តិភាពអោយបានស្ថិតស្ថេរ និងត្រូវទៅចូលរួមបោះឆ្នោតជ្រើសតំណាងរាស្ត្រនីតិកាលទី៦ នៃរដ្ឋសភា នាថ្ងៃទី២៩ ខែកក្កដា ឆ្នាំ២០១៨ អោយបានគ្រប់ៗគ្នា ដើម្បីការពារសន្តិភាពដែលយើងមានរួចហើយ និងដើម្បីអភិវឌ្ឍន៍ភូមិ ឃុំ របស់យើងឱ្យមានការរីកចម្រើនជាបន្តបន្ទាប់ទៅទៀត។
*សូមបញ្ជាក់ថា៖ ផ្លូវបេតុងអាមេ និងផ្លូវក្រួសក្រហម ដែលត្រូវបើកការដ្ឋានសាងសង់នៅថ្ងៃនេះ រួមមាន ៖
+ផ្លូវបេតុងអាមេប្រវែង ១៧៧០ ម៉ែត្រ ទទឺង ៤ ម៉ែត្រ នៅភូមិទឹកឃ្លាំង ភូមិជ្រោយពិសី និងភូមិសំរោង ក្នុងឃុំទឹកឃ្លាំង
+ផ្លូវបេតុងអាមេប្រវែង ៤០០ ម៉ែត្រ ទទឺង ៥ ម៉ែត្រ ក្នុងឃុំថ្មគរ
+ផ្លូវក្រាលក្រួសក្រហមប្រវែង ៣៩០០ ម៉ែត្រ ទទឹង ៦ម៉ែត្រ ជើងទេរ ១ម៉ែត្រ សង្ខាង ក្នុងឃុំថ្មគរ (ចាប់ពីគល់ស្ពានព្រំប្រទល់ឃុំថ្មគរ និងឃុំកោះរះ)។
*ក្នុងឱកាសនោះដែរ ឯកឧត្តម អភិបាលខេត្ត បានឧបត្ថម្ភ ប្រជាពលរដ្ឋអញ្ជើញចូលរួមចំនួន ៥០០នាក់ ក្នុងម្នាក់ៗទទួលបានថវិកា ចំនួន ១ មុឺនរៀល។
