ថ្ងៃអាទិត្យ ៧ រោច ខែពិសាខ ឆ្នាំច សំរឹទ្ធិស័ក ពុទ្ធសករាជ ២៥៦២ ត្រូវនឹងថ្ងៃទី៦ ខែឧសភា ឆ្នាំ២០១៨ លោកជំទាវ មិថុនា ភូថង អភិបាល នៃគណៈអភិបាលខេត្តកោះកុង អញ្ជើញ ជាអធិបតី ក្នុងពិធីចែកអំណោយ ជូនប្រជាពលរដ្ឋចំនួន ១,០០០ នាក់ ដែលមកពីស្រុកកោះកុង ស្រុកបូទុមសាគរ និងស្រុកមណ្ឌលសីមា ព្រមទាំងក្រុងខេមរភូមិន្ទ។ លោកជំទាវ ថ្លែងអណរគុណ ដល់លោក ផុនអេក ផល្លាដេត នាយកក្រុមហ៊ុន KKN និងសប្បុរសជននានា ដែលមានព្រះតេជគុណ បិយធម្មោ ធី អាំភុន ព្រះគ្រូសូត្រស្តាំ វត្តប៉ាក់ខ្លង ស្រុកមណ្ឌលសីមា បានគៀងគរសប្បុរសជននានា ដើម្បីចែកជូនបងប្អូននាឱកាសនេះ ចាត់ទុកជាវប្បធម៌ចែករំលែក។ លោកជំទាវ បានជម្រាបជូន អង្គពិធីទាំងមូល អំពីដំណើការកសាងប្រទេសរហូតមានការរីកចំរើនលើគ្រប់វិស័យ ដូចសព្វថ្ងៃនេះ ខេត្តកោះកុងយើងក៏មានឱកាសទទួលបានវិនិយោគិន មកបោះទុន វិនិយោគ ព្រមទាំងបង្កើនការងារជាច្រើន ដល់បងប្អូនប្រជាពលរដ្ឋយើងផងដែរ៕ ប្រភពព័ត៌មាន: រដ្ឋបាលខេត្តកោះកុង (ថ្ងៃទី០៦ ខែឧសភា ឆ្នាំ២០១៨)
