នៅព្រឹកថ្ងៃសៅរ៍ ៦រោច ខែពិសាខ ឆ្នាំច សំរឹទ្ធិស័ក ព.ស.២៥៦២ ត្រូវនឹង ថ្ងៃទី០៥ ខែឧសភា ឆ្នាំ ២០១៨ សាខាកាកបាទក្រហមកម្ពុជា ខេត្តកណ្តាល បានប្រារព្ធពិធីមីទ្ទិញអបអរសាទរខួបលើកទី១៥៥ ទិវាពិភពលោកកាកបាទក្រហម អឌ្ឍច័ន្ទក្រហម ៨ឧសភា ឆ្នាំ២០១៨ ក្រោមប្រធានបទ "កាកបាទក្រហមកម្ពុជាមានគ្រប់ទីកន្លែង សម្រាប់គ្រប់ៗគ្នា មិនទុកនរណាម្នាក់ចោល" ។
កម្មវិធីនេះប្រព្រឹត្តទៅក្រោមអធិបតីភាពដ៏ខ្ពង់ខ្ពស់ លោកជំទាវ ឃួន សុដារី អនុប្រធានកាកបាទក្រហមកម្ពុជា តំណាងដ៏ខ្ពង់ខ្ពស់ សម្តេចកត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា និងឯកឧត្តមបណ្ឌិត ម៉ៅ ភិរុណ អភិបាលនៃគណៈអភិបាលខេត្តកណ្តាល និងជាប្រធានកិត្តិយសសាខាកាកបាទក្រហមកម្ពុជាខេត្តកណ្តាល ព្រមទាំងមានការនិមន្ត និងអញ្ជើញចូលរួមពីព្រះសង្ឃ ឯកឧត្ដម លោកជំទាវ លោក លោកស្រី ជាសមាជិក សមាជិកា សាខាកាកបាទក្រហមកម្ពុជាខេត្ត និងអនុសាខាក្រុង ស្រុក សិស្ស និស្សិត យុវជនស្ម័គ្រចិត្ត ព្រមទាំងសប្បុរសជន សរុបប្រមាណចំនួន ៣៧៨០នាក់។
កម្មវិធីនេះសាខាកាកបាទក្រហមកម្ពុជាខេត្តកណ្តាលទទួលបានថវិកា ឧបត្ថម្ភពីសប្បុរសជនសម្រាប់ទុកបម្រុងយកទៅជួយជនរងគ្រោះមានចំនួនសរុប ៥១៣០៧២ ដុល្លារអាមេរិក (ប្រាំរយដប់បីពាន់ ចិតសិបពីរ ដុល្លារអាមេរិក)។ ប្រភពព័ត៌មាន: រដ្ឋបាលខេត្តកណ្តាល (ថ្ងៃទី០៥ ខែឧសភា ឆ្នាំ២០១៨)