ថ្ងៃសៅរ៍ ៦ រោច ខែពិសាខ ឆ្នាំច សំរឹទ្ធិស័ក ពុទ្ធសករាជ ២៥៦២ ត្រូវនឹងថ្ងៃទី៥ ខែឧសភា ឆ្នាំ២០១៨ លោកជំទាវ មិថុនា ភូថង អភិបាល នៃគណៈអភិបាលខេត្តកោះកុង បានអញ្ជើញជាអធិបតី ក្នុងពិធីប្រារព្ធខួបលើកទី១៣២ នៃទិវាពលកម្មអន្តរជាតិ ថ្ងៃទី១ ខែឧសភា ឆ្នាំ២០១៨ នៅក្នុងតំបន់សេដ្ឋកិច្ចពិសេសកោះកុង នាងកុក នៅស្រុកមណ្ឌលសីមា។ លោកជំទាវ បានមានប្រសាសន៍ថា រាជរដ្ឋាភិបាលកម្ពុជា បានដាក់ចេញនិងអនុវត្តដោយជោគជ័យនូវយុទ្ធសាស្ត្រចតុកោណដំណាក់កាលទី១ ទី២ និងទី៣ ដើម្បីកំណើនការងារ សមធម៌ ការងារ និងប្រសិទ្ធភាព ដោយផ្តោតការយកចិត្តទុកដាក់ខ្លាំងលើកំណែទម្រង់លើគ្រប់វិស័យ ដោយឡែកគោលនយោបាយជាតិមុខរបរ និងការងារ គោលនយោបាយអភិវឌ្ឍន៍វិស័យឧស្សាហកម្ម គោលនយោបាយជាតិ ស្តីពីការអប់រំបណ្តុះបណ្តាលបច្ចេកទេស និងវិជ្ជាជីវៈ និងក្របខណ្ឌគោលនយោបាយជាតិគាំពារសង្គម។ បច្ចុប្បន្នសេដ្ឋកិច្ចកម្ពុជា សម្រេចបានកំណើនថេរ ជាមធ្យមប្រចាំឆ្នាំ ៧ ភាគរយ។ ជាក់ស្តែងសព្វថ្ងៃនេះបងប្អូនកម្មករនិយោជិត ទទួលបាន ៖
១-ពិនិត្យ និងព្យាបាលជម្ងឺ នៅតាមមន្ទីរពេទ្យរដ្ឋទាំងអស់ ដោយមិនបង់ប្រាក់
២-បានអនុវត្តកម្មវិធីផ្តល់ប្រាក់ឈ្នួល ១២០ ភាគរយ និងការឈប់សម្រាករយៈពេល ៣ខែ ក្នុងពេលសម្រាលកូនជូនកម្មការិនី
៣-ផ្តល់ប្រាក់ឧបត្ថម្ភដល់កម្មការិនីសម្រាលកូន ១នាក់ ផ្តល់ជូនកូន១នាក់ ៤០ ម៉ឺនរៀល កូនភ្លោះ២នាក់ ៨០ ម៉ឺនរៀល និងកូនភ្លោះ៣នាក់ ១លាន ២សែនរៀល ព្រមទាំងថវិកា បន្ថែម ៥ លានរៀល ពីសម្តេចតេជោ នាយករដ្ឋមន្ត្រី នុងសម្តេចកិត្តិព្រឹទ្ធបណ្ឌិត ផ្ទាល់
៤-រាជរដ្ឋាភិបាល បានបង់ភាគទានរបបសន្តិសុខសង្គមផ្នែកថែទាំសុខភាព ១០០ ភាគរយ ចាប់ពីខែមករា ឆ្នាំ២០១៨
៥-រដ្ឋបាលថ្នាក់ក្រោមជាតិ បានត្រួតពិនិត្យជាប្រចាំនូវថ្លៃឈ្នួលផ្ទះ ថ្លៃទឹក និងថ្លៃអគ្គិសនី នៅតាមផ្ទះជួល និងធ្វើដំណើរតាមរថយន្តក្រុងក្នុងរាជធានីភ្នំពេញ ដោយឥតបង់ប្រាក់
៦-រាជរដ្ឋាភិបាលកំពុងរៀបចំដាក់អោយអនុវត្តរបបសន្តសុខសង្គមផ្នែកសោធននិវត្តន៍ឆ្នាំ២០១៩
៧-រាជរដ្ឋាភិបាល ផ្តល់ហិរញ្ញប្បទាន សម្រាប់ទូទាត់ប្រាក់ឈ្នួល និងប្រាក់អត្ថប្រយោជន៍ផ្សេងៗ ជូនកម្មករនិយោជិត ដែលរោងចក្របិទទ្វារដោយម្ចាស់រត់ចោល
៨-រាជរដ្ឋាភិបាល កំពុងពង្រឹងកិច្ចសហការ ជាមួយប្រទេសជាដៃគូ។ បងប្អូន ដែលបម្រើការងារ នៅក្នុងតំបន់សេដ្ឋកិច្ចពិសេសកោះកុង នាងកុក ក៏ទទួលបានអត្ថប្រយោជន៍ដូចគ្នាផងដែរ។
លោកជំទាវ បានបន្តរំលឹកអំពីដំណើរការកសាងប្រទេសជាតិកន្លងមក និងការអភិវឌ្ឍន៍លើគ្រប់វិស័យ និងការអភិវឌ្ឍជាបន្តបន្ទាប់សម្រាប់ខេត្តកោះកុង ព្រមទាំងផ្តល់ជាវត្ថុអនុស្សាវរីយ៍ ជូនបងប្អូន ដោយឆ្លើយសំនួរ និងការចាប់រង្វាន់ផ្សងសំណាង៕
ប្រភពព័ត៌មាន: រដ្ឋបាលខេត្តកោះកុង (ថ្ងៃទី០៥ ខែឧសភា ឆ្នាំ២០១៨)