កំពង់ឆ្នាំង៖ ឯកឧត្តម អម សុភា អភិបាលរងខេត្តកំពង់ឆ្នាំង បានជម្រុញឱ្យប្រធានមន្ទីរអង្គភាពជុំវិញខេត្ត អនុវត្តឱ្យបានត្រឹមត្រូវតាមតួនាទីភារកិច្ចរបស់ខ្លួន និងបន្តដោះស្រាយបញ្ហាប្រឈមដែលនៅសេសសល់។ ឯកឧត្តម បានជំរុញបែបនេះ នាព្រឹកថ្ងៃទី២៦ ខែមករា ឆ្នាំ២០២១ ក្នុងកិច្ចប្រជុំឆ្លងរបាយការណ៍ប្រចាំខែកុម្ភៈ ឆ្នាំ២០២១ របស់រដ្ឋបាលខេត្តកំពង់ឆ្នាំង នៅសាលប្រជុំសាលាខេត្តកំពង់ឆ្នាំង ដោយមានការចូលរួមពី លោកនាយករងរដ្ឋបាលខេត្ត លោកលោកស្រីនាយកទីចាត់ការចំណុះសាលាខេត្ត និងប្រធានអង្គភាពជុំវិញខេត្តចូលរួមផងដែរ។

ឯកឧត្តម អម សុភា បានថ្លែងនូវការកោតសរសើរដល់ថ្នាក់ដឹកនាំទីចាត់ការអន្តរវិស័យរបស់រដ្ឋបាលខេត្ត ថ្នាក់ដឹកនាំអង្គភាពជុំវិញខេត្ត បានអនុវត្តតាមតួនាទីភារកិច្ចរបស់សម្រេចបានលទ្ធផលល្អ បង្កើនការអភិវឌ្ឍ ឆ្ពោះទៅមូលដ្ឋាន បានចូលរួមចំណែកយ៉ាងសកម្មជាមួយរាជរដ្ឋាភិបាលក្នុងលើកកំពស់ជីវភាពរស់នៅរបស់ប្រជាពលរដ្ឋនៅមូលដ្ឋាន។

ឯកឧត្តម អម សុភា បានផ្តាំផ្ញើឱ្យគ្រប់អង្គភាពជុំវិញខេត្ត ដើម្បីសម្រេចបាននូវសូចនាករមួយប្រកបដោយប្រសិទ្ធភាពខ្ពស់ ត្រូវប្រតិបត្តិតាមតួនាទី ភារកិច្ចរបស់ខ្លួនដោយមាន ផែនការសកម្មភាពការងារច្បាស់លាស់ស្របតាមគោលនយោបាយយុទ្ធសាស្រ្តចតុកោណដំណាក់កាលទី៤ របស់រាជរដ្ឋាភិបាលដែលមានសម្តេច តេជោ ហ៊ុន សែនជាប្រមុខ។ ជាពិសេសត្រូវបន្តយកចិត្តទុកដាក់ចូលរួមផ្សព្វផ្សាយ អប់រំអំពីវិធានការ ការពារការរីករាលដាលជំងឺកូវីដ-១៩ ឱ្យប្រជាពលរដ្ឋបានយល់ជ្រួតជ្រាបអនុវត្តន៍បានត្រឹមត្រូវតាមការណែនាំរបស់ក្រសួងសុខាភិបាលបានកំណត់ ៕

ប្រភព៖ រដ្ឋបាលខេត្តកំពង់ឆ្នាំង