នាព្រឹកថ្ងៃព្រហស្បតិ៍​ ១២កើត ខែពិសាខ ឆ្នាំច សំរឹទ្ធិស័ក ព.ស.២៥៦១ ត្រូវនឹងថ្ងៃទី២៦​ ខែមេសា ឆ្នាំ២០១៨ នៅឃុំសំរោងធំ​ ស្រុកកៀនស្វាយ ខេត្តកណ្តាល មានរៀបចំពិធីបើកការដ្ឋានសាងសង់ផ្លូវបេតុងអាមេ ដែល​មាន​ប្រវែងសរុប២០០០ម៉ែត្រ ស្ថិតនៅភូមិសំរោងក្អែ​ ឃុំសំរោងធំ​ ស្រុកកៀនស្វាយ​ ខេត្តកណ្តាល ដែលពិធី​នេះប្រព្រឹត្តទៅក្រោមអធិបតីភាព ឯ.ឧ ម៉ៅ ភិរុណ អភិបាលនៃគណៈអភិបាលខេត្ត។

ក្នុងពិធីនេះក៏មានការអញ្ជើញចូលរួមពីសំណាក់ ឯ.ឧ លោកជំទាវ សមាជិក សមាជិកា ក្រមប្រឹក្សាខេត្ត អភិបាលរងខេត្ត ប្រធាន អនុប្រធានមន្ទីរ ជុំវិញខេត្ត, មន្ត្រីរាជការ កងកម្លាំងជុំវិញខេត្តនិងស្រុក មេឃុំទាំង៨ នៃស្រុកកៀនស្វាយ មន្ត្រីពាក់ព័ន្ធ និងប្រជាពលរដ្ឋ សរុបជាង ៥០០ នាក់។

*នាឱកាសនោះ ឯកឧត្តម បានគូសបញ្ជាក់នូវការអភិវឌ្ឍន៍រីកចម្រើនលើគ្រប់វិស័យទាំងផ្នែករូបវ័ន្ត និងផ្នែកអរូបវន្ត័​ មានការកើនឡើងនូវកំណើនសេដ្ឋកិច្ចប្រកបដោយចីរភាព ការផ្តល់អត្ថប្រយោជន៍និងកិច្ចគាំពារនានារបស់រាជរដ្ឋាភិបាលចំពោះកម្មករ កម្មការនី ការពន្យល់បំភ្លឺអំពីនយោបាយប្រជាភិថុតិ និងការប្រព្រឹត្តនូវសកម្មភាព​ល្មើសច្បាប់ របស់អតីតគណបក្សសង្គ្រោះជាតិដែលនាំទៅដល់ការរំលាយ ព្រមទាំងសារសំខាន់នៃសន្តិភាពដែលជាបុរេល័ក្ខខ័ណ្ឌមិនអាចខ្វះបាន សម្រាប់ការអភិវឌ្ឍន៍ ជម្រាបជូនបងប្អូនប្រជាពលរដ្ឋទាំងអស់ដែល​បានចូលរួមក្នុងអង្គពិធី ។

*ជាមួយគ្នានេះដែរ ឯកឧត្តមក៏បានណែនាំដល់ក្រុមហ៊ុនទទួលការ និងអាជ្ញាធរដែនដី ក៏ដូចជាប្រជាពលរដ្ឋ ដូចខាងក្រោម៖

+ ផ្តាំផ្ញើដល់ក្រុមហ៊ុនសាងសង់ផ្លូវ ត្រូវគោរព និងអនុវត្តឲ្យបានត្រឹមត្រូវតាម បទដ្ឋានបច្ចេកទេស ធានានូវគុណភាព។

+​ ចូលរួមថែរក្សនូវសន្តិភាពដែលបានមកក្រោមនយោបាយឈ្នះឈ្នះរបស់សម្តេចអគ្គមហាសេនាបតីតេជោហ៊ុន​ សែន​ ដែលធ្វើអោយប្រទេសមានការអភិវឌ្ឍលើគ្រប់វិស័យ​ ពោល​ មានសន្តិភាព​ មានការអភិវឌ្ឍ។

+​ ជំរុញអោយប្រជាជនក្នុងការបង្កបង្កើនផលកសិកម្ម​បន្ថែមទៀត​ ដើម្បីលើកកម្ពស់កម្រិតជីវភាព​ អោយស្រប​ទៅតាមការរីកចម្រើនសេដ្ឋកិច្ច​ និងគោលនយោបាយរបស់រដ្ឋាភិបាល។

+ត្រូវអំពាវនាវអោយប្រជាពលរដ្ឋទាំងអស់ត្រូវចូលរួមថែរក្សាសន្តិភាពអោយបានស្ថិតស្ថេរ និងត្រូវទៅចូលរួមបោះឆ្នោតជ្រើសតំណាងរាស្ត្រនីតិកាលទី៦ នៃរដ្ឋសភា នាថ្ងៃទី ២៩ ខែកក្កដា ឆ្នាំ២០១៨ អោយបានគ្រប់ៗគ្នា​ ដើម្បីការពារសន្តិភាពដែលយើងមានរួចហើយ​ និងដើម្បីអភិវឌ្ឍន៍ភូមិ​ ឃុំរបស់យើងឱ្យមានការរីកចម្រើនជាបន្តបន្ទាប់ទៅទៀត។ *នៅចុងបញ្ចប់នៃពិធី ឯ.ឧ អភិបាលខេត្ត បានឧបត្ថម្ភដល់ប្រជាពលរដ្ឋអញ្ជើញចូលរួមចំនួន៥០០ នាក់ ក្នុងម្នាក់ៗ​ទទួលបានថវិកា ចំនួន ១ មុឺនរៀល៕

ប្រភពព័ត៌មាន: រដ្ឋបាលខេត្តកណ្តាល (ថ្ងៃទី២៦ ខែមេសា ឆ្នាំ២០១៨)