នាព្រឹកថ្ងៃច័ន្ទ ០៩កើត ខែពិសាខ ឆ្នាំច សំរឹទ្ធិស័ក ព.ស.២៥៦១ ត្រូវនឹងថ្ងៃទី២៣ ខែមេសា ឆ្នាំ២០១៨នេះ លោកជំទាវ ឯក សុវណ្ណភារៈ អភិបាលរង នៃគណៈអភិបាលខេត្តស្វាយរៀង តំណាងឯកឧត្ដម ម៉ែន វិបុល អភិបាលនៃគណៈអភិបាលខេត្ត និងលោក តាក់ ស៊ុនហួត អនុប្រធាននាយកដ្ឋានហេដ្ឋារចនាសម្ព័ន្ធផ្លូវទឹក និងសំណង់កំពង់ផែ នៃក្រសួងសាធារណការ និងដឹកជញ្ជូន បានអញ្ជើញជាអធិបតីក្នុងពិធីក្រុងពាលី បញ្ចុះបឋមសិលា និងដំណើរបើកការដ្ឋានសាងសង់កំពង់ផែអូរស្មាច់ ស្ថិតនៅភូមិចុងព្រែក សង្កាត់ស្វាយរៀង ក្រុងស្វាយរៀង ខេត្តស្វាយរៀង ។

ក្នុងពិធីនេះ ក៏មានការអញ្ជើញចូលរួមពីមន្ត្រីជំនាញ នៃនាយកដ្ឋានហេដ្ឋារចនាសម្ព័ន្ធផ្លូវទឹក និងសំណង់កំពង់ផែ ក្រសួងសាធារណការ និងដឹកជញ្ជូន លោកប្រធានមន្ទីរសាធារណការ និងដឹកជញ្ជូនខេត្ត លោកស្នងការរងនគរបាលខេត្ត លោកមេបញ្ជាការរងតំបន់ប្រតិបត្តិការសឹករងស្វាយរៀង តំណាងបញ្ជាការដ្ឋានកងរាជអាវុធហត្ថខេត្ត លោកប្រធានមន្ទីរនានាក្នុងខេត្ត អាជ្ញាធរក្រុងស្វាយរៀង និងមន្រ្តីរាជការមន្ទីរសាធារណការ និងដឹកជញ្ជូនខេត្តស្វាយរៀង សរុបប្រមាណ ៦០នាក់ ។ សូមបញ្ជាក់ថា គម្រោងសាងសង់កំពង់ផែអូរស្មាច់នេះ ក្រៅពីចាក់ដី និងលើកដីសម្រាប់សាងសង់ជាកំពង់ផែ ក៏នឹងធ្វើការស្ថាបនាផ្លូវដីថ្មី ព្រមទាំងស្ថាបនាផែដែកបណ្តែតទឹក និងផ្លូវបេតុង សម្រាប់ចុះផែ ផងដែរ ៕

ប្រភពព័ត៌មាន: រដ្ឋបាលខេត្តស្វាយរៀង (ថ្ងៃទី ២៣ ខែមេសា ឆ្នាំ២០១៨)