រសៀលថ្ងៃព្រហស្បតិ៍ ទី២៤ ខែធ្នូ ឆ្នាំ២០២០ លោកជំទាវ ផាវ៉ាន់ សាកឿត សមាជិកក្រុមប្រឹក្សាខេត្ត ឯកឧត្តម ងួន រតនៈ អភិបាល នៃគណៈអភិបាលខេត្តបាត់ដំបង បានអញ្ជើញអធិបតីក្នុងវេទិកាផ្សព្វផ្សាយ និងពិគ្រោះយោបល់របស់ក្រុមប្រឹក្សាខេត្តបាត់ដំបង អាណត្តិទី៣ សម្រាប់ឆ្នាំ២០២០ ក្រោមប្រធានបទ " ការផ្តល់សេវាសាធារណ: និងការអភិវឌ្ឍមូលដ្ឋាន " នៅស្រុកសំពៅលូន ខេត្តបាត់ដំបង។

ក្នុងអង្គវេទិកានេះក៏មានការអញ្ជើញចូលរួមពី ឯកឧត្តម លោកជំទាវ សមាជិកក្រុមប្រឹក្សាខេត្ត ថ្នាក់ដឹកនាំមន្ទីរ អង្គភាព ជុំវិញខេត្ត ថ្នាក់ដឹកនាំស្រុក ឃុំ ភូមិ ដែលតំណាងឱ្យប្រជាពលរដ្ឋនៅតាមមូលដ្ឋាន។

គោលបំណងនៃវេទិកានេះ គឺដើម្បីផ្សព្វផ្សាយអំពីតួនាទីភារកិច្ច ការទទួលខុសត្រូវរបស់ក្រុមប្រឹក្សា គណៈអភិបាលខេត្ត ការពិគ្រោះយោបល់ និងការឆ្លើយតបអំពីបញ្ហា ក្ដីកង្វល់ និងតម្រូវការជាអាទិភាពរបស់ប្រជាពលរដ្ឋ និងអ្នកពាក់ព័ន្ធនានា ព្រមទាំងពិភាក្សាស្រាយបំភ្លឺអំពីបញ្ហាផ្សេងៗដល់អ្នកចូលរួមទាំងអស់ ក្នុងការលើកកម្ពស់ ការឆ្លើយតបចំពោះតម្រូវការរបស់មូលដ្ឋាន ព្រមទាំងរកដំណោះស្រាយឲ្យបានសមស្រប និងឆ្លើយតបបានទាន់សភាពការណ៍។

ក្នុងនោះដែរ គឺជាការអនុវត្តគោលនយោបាយកំណែទម្រង់វិមជ្ឈការ និងវិសហមជ្ឈការរបស់រាជរដ្ឋាភិបាលកម្ពុជា ដែលតម្រូវឲ្យមានការកែលំអប្រព័ន្ធអភិបាលកិច្ចល្អនៅថ្នាក់រដ្ឋបាលនានា ដើម្បីជំរុញលទ្ធិប្រជាធិបតេយ្យនៅថ្នាក់មូលដ្ឋាន និងជំរុញកិច្ចអភិវឌ្ឍន៍សេដ្ឋកិច្ច សង្គមកិច្ចក្នុងការធានាការរួមចំណែកនៃការកាត់បន្ថយភាពក្រីក្រនៅទូទាំងប្រទេសកម្ពុជា៕

ប្រភព៖ រដ្ឋបាលខេត្តបាត់ដំបង