នារសៀលថ្ងៃពុធ ១១រោច កើត ខែចេត្រ ឆ្នាំរកា នព្វស័ក ព.ស.២៥៦១ ត្រូវនឹងថ្ងៃទី១១ ខែមេសា ឆ្នាំ២០១៨ នៅសាលាខេត្តកណ្តាល មានរៀបចំពិធីសំណេះសំណាលជាមួយនិវត្តជន នៅក្រុងតាខ្មៅ ក្រោមអធិបតីភាព ឯកឧត្តម ម៉ៅ ភិរុណ អភិបាលនៃគណៈអភិបាលខេត្តកណ្តាល។ សមាសភាពអញ្ជើញចូលរួមមាន ឯកឧត្តម លោកជំទាវអភិបាលរងខេត្ត លោកជំទាវសមាជិកក្រុមប្រឹក្សាខេត្ត លោក លោកស្រី នាយករដ្ឋបាល ប្រធានអនុប្រធានមន្ទីរអង្គភាពជុំវិញខេត្ត អភិបាល អភិបាលងរងក្រុង ចៅសង្កាត់ទាំង៦ និងអតីតយុទ្ធជនក្រុងតាខ្មៅ ចំនួន ៩៩០ នាក់។ គួររម្លឹកផងដែរ គិតចាប់ពីឆ្នាំ២០១៥ មក រដ្ឋបាលខេត្តកណ្តាលបានរៀបចំពិធីសំណេះសំណាលជាមួយនិវត្តជនក្នុងក្រុងតាខ្មៅបានចំនួន០៣ លើក រួចមកហើយ។ ពិធីសំណេះសំណាល នាថ្ងៃនេះ គឺជាព្រឹត្តិការណ៍ដ៍មានសារសំខាន់មួយ សម្រាប់រដ្ឋបាលខេត្តកណ្តាល ហើយពិធីនេះពិតជាបានបង្ហាញពីការយកចិត្តទុកដាក់ និងជាការផ្តល់សារ ចំពោះបងៗពូ មីង ជានិវត្តជនយើង បើទោះបីជា លោក លោកស្រីបានចូលនិវត្តន៍ទៅហើយ ក៏រាជរដ្ឋាភិបាល និងរដ្ឋបាលខេត្តនៅតែផ្តល់តម្លៃ និងយល់ពីសារសំខាន់ របស់លោក លោកស្រី ព្រោះថា «និវត្តជន ជាឃ្លាំងទ្រព្យ ឃ្លាំងចំណេះ » «ជាអ្នកត្រួសត្រាយផ្លូវ» សម្រាប់មន្ត្រីជំនាន់ក្រោយក្នុងការអនុវត្តការងារបន្ត និងក្រេបជញ្ជក់យកចំពោះដឹង បទពិសោធន៍ ដែលលោកស្រី អស់លោកបានបន្សល់ទុក និងឆ្លងកាត់។ ព្រឹត្តិការណ៍ថ្ងៃនេះ ក៏ជាការបង្ហាញនូវគុណធម៌ សីលធម៌ និងកតញ្ញូតាធម៌សម្រាប់មន្ត្រីរាជការ កងកម្លាំងប្រដាប់អាវុធ ដែលកំពុងបម្រើការងារ ចំពោះរាមច្បង ដែលបានចូលនិវត្តន៍។ ជាការពិត និវត្តជន ក៏ដូចជាអតីតយុទ្ធជនគឺជាជនដែលមានគុណបំណាច់ដ៏ធំធេងចំពោះជាតិមាតុភូមិ ជានិមិត្តរូបនៃការខិតខំ ការសាមគ្គី ការកសាង ស្មារតីលះបង់ ធ្វើពលីកម្មដើម្បីជាតិ និងជាអ្នកស្នេហាជាតិពិតប្រាកដដោយស្តែងចេញសកម្មភាពជាក់ស្តែងរបស់ខ្លួន។ ជាទីបញ្ចប់ ឯកឧត្តមគណៈអធិបតីបានឧបត្ថម្ភដល់និវត្តជន ទាំង ៩៩០ នាក់ ក្នុងម្នាក់ៗថវិកា ៥ ម៉ឺនរៀល។
ប្រភពព័ត៌មាន: រដ្ឋបាលខេត្តកណ្តាល (ថ្ងៃទី១១ ខែមេសា ឆ្នាំ២០១៨)