នារសៀលថ្ងៃចន្ទ ០៩រោច កើត ខែចេត្រ ឆ្នាំរកា នព្វស័ក ព.ស.២៥៦១ ត្រូវនឹងថ្ងៃទី០៩ ខែមេសា ឆ្នាំ២០១៨ នៅសាលាខេត្តកណ្តាល មានរៀបចំពិធីសំណេះសំណាលជាមួយអតីតយុទ្ធជន និងបំពាក់គ្រឿងឥស្សរិយយសជូនអតីតយុទ្ធជន នៅក្រុងតាខ្មៅ ក្រោមអធិបតីភាព ឯកឧត្តម ម៉ៅ ភិរុណ អភិបាលនៃគណៈអភិបាលខេត្តកណ្តាល។ សមាសភាពអញ្ជើញចូលរួមមាន ឯកឧត្តម លោកជំទាវអភិបាលរងខេត្ត លោកជំទាវសមាជិកក្រុមប្រឹក្សាខេត្ត លោក លោកស្រី នាយករដ្ឋបាល ប្រធានអនុប្រធានមន្ទីរអង្គភាពជុំវិញខេត្ត អភិបាល អភិបាលងរងក្រុង ចៅសង្កាត់ទាំង៦ និងអតីតយុទ្ធជនក្រុងតាខ្មៅ ចំនួន ៦០៣ នាក់។ ការរៀបចំពិធីសំណេះសំណាលជាមួយបងប្អូនជាអតីតយុទ្ធជននាឱកាសនេះគឺធ្វើឡើងក្នុងគោលដៅមួយដើម្បីចងចាំនូវពលីកម្មដ៏ធំធេង និងមិនអាចកាត់ថ្លៃបានចំពោះយុទ្ធជន យុទ្ធនារី ប្រជាជន និងអ្នកសេ្នហាជាតិទាំងឡាយ ដែលបានធ្វើពលីកម្ម បូជាសាច់ស្រស់ ឈាមស្រស់ ដើម្បីបុព្វហេតុជាតិមាតុភូមិ និងប្រជាជននៅគ្រប់ដំណាក់កាល។ អតីតយុទ្ធជនគឺជាជនដែលមានគុណបំណាច់ចំពោះជាតិមាតុភូមិ ជានិមិត្តរូបនៃស្មារតីលះបង់ ធ្វើពលីកម្មដើម្បីជាតិ និងជាអ្នកស្នេហាជាតិពិតប្រាកដដោយស្តែងចេញសកម្មភាពជាក់ស្តែងរបស់ខ្លួន។ គួរបញ្ជាក់ផងដែរថា មេដាយដែលបំពាក់ជូនអតីតយុទ្ធជននាពេលនេះ រួមមាន មេដាយមាសចំនួន ១៨ គ្រឿង មេដាយប្រាក់ ចំនួន ២៦៨ គ្រឿង មេដាយសំរឹទ្ធ ចំនួន ៣១៧ គ្រឿង។ ជាទីបញ្ចប់ ឯកឧត្តមគណៈអធិបតីបានឧបត្ថម្ភដល់អតីតយុទ្ធជន ទាំង ៦០៣ នាក់ ក្នុងម្នាក់ៗថវិកា ៥ ម៉ឺនរៀល ប្រភពព័ត៌មាន: រដ្ឋបាលខេត្តកណ្តាល (ថ្ងៃទី ០៩ ខែមេសា ឆ្នាំ២០១៨)