កំពង់ឆ្នាំង៖ នៅព្រឹកថ្ងៃសុក្រ ទី១៣ ខែវិច្ឆិកា ឆ្នាំ២០២០នេះ ឯកឧត្ដម អម សុភា អភិបាលរងខេត្ត និងជាប្រធានគណៈកម្មាធិការសាខាកាកបាទក្រហមកម្ពុជា ខេត្តកំពង់ឆ្នាំង រួមដំណើរដោយ លោកជំទាវ ប៊ន សុភី អភិបាលរងខេត្ត និងជាអនុប្រធានគណៈកម្មាធិការសាខា ឯកឧត្ដម សៀត គឹមលៀង អនុប្រធានគណៈកម្មាធិការសាខា មន្ត្រីប្រតិបត្តិសាខា អនុសាខា បានអញ្ជើញចុះសួរសុខទុក្ខ គ្រួសារចាស់ជរា គ្មានទីពឹង ១៥គ្រួសារ ក្នុងឃុំអណ្ដូងស្នាយ និងឃុំព្រៃមូល ស្រុករលាប្អៀរ ខេត្តកំពង់ឆ្នាំង។
នាឱកាសនោះ ឯកឧត្ដម អម សុភា ប្រធានគណៈកម្មាធិការសាខា ក៏បានពាំនាំការសួរសុខទុក្ខពីសំណាក់ឯកឧត្តម ឈួរ ច័ន្ទឌឿន ប្រធានកិត្តិយសសាខាខេត្ត និងជាពិសេស ការសួរសុខទុក្ខពីសំណាក់សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា គឺមិនទុកឱ្យប្រជាពលរដ្ឋណាម្នាក់ស្លាប់ដោយអត់អាហារឡើយ។ ក្នុងនោះផងដែរ ឯកឧត្ដមក៏បានផ្ដាំផ្ញើអោយប្រជាពលរដ្ឋទាំងអស់ យល់ដឹងអំពីវិធីបង្ការ ការពារ ការដាក់ខ្លួនឱ្យស្ថិតនៅដាច់ដោយឡែក ការប្រើប្រាស់ម៉ាសឱ្យបានត្រឹមត្រូវ ដើម្បីការបង្ការ និងទប់ស្កាត់ ជម្ងឺកូវីដ ១៩ ដែលកំពុងរីករាលដាលទូទាំងសកលលោក។
អំណោយក្នុងមួយគ្រួសារទទួលបានមាន៖ អង្ករ ២៥គីឡូក្រាម, មី ០១កេស, ត្រីខ ១០កំប៉ុង, មុង ០១, ភួយ ០១, ក្រមា ០១, សារុង ០១, សាប៊ូ ២ដុំ, ទឹកត្រី/ទឹកស៊ីអ៊ីវ ១យួរ, សាប៊ូលាងចាន ៤ដប (២លីត្រ ជាអំណោយរបស់អនុសាខាកក្រក ស្រុករលាប្អៀរ) និងថវិកា ៤០,០០០រៀល ៕
ប្រភព៖ រដ្ឋបាលខេត្តកំពង់ឆ្នាំង