មន្ទីរសុខាភិបាលខេត្តក្រចេះ ធ្វើការប្រកាសតែងតាំងមុខតំណែង ប្រធាន អនុប្រធានការិយាល័យ និងប្រធាន អនុប្រធានមណ្ឌលសុខភាព ជាច្រើនរូប ក្រោមអធិបតីភាព លោក វ៉ា ថន អភិបាលរងខេត្តក្រចេះ និងអស់លោកស្រីនៅមន្ទីរសុខាភិបាល ព្រមទាំងលោកគ្រូអ្នកគ្រូពេទ្យ មកពីមណ្ឌលសុខភាពនានា នៅសាលប្រជុំមន្ទីរសុខាភិបាល ខេត្តក្រចេះ នារសៀលថ្ងៃព្រហស្បតិ៍ ៥រោច ខែចេត្រ ឆ្នាំរកា នព្វស័ក ព.ស.២៥៦១ ត្រូវនឹងថ្ងៃទី៥ ខែមេសា ឆ្នាំ២០១៨នេះ។ ប្រធានមន្ទីរសុខាភិបាលខេត្តក្រចេះ លោក ឈ្នាង សុវត្ថា បានឲ្យដឹងថា ការតែងតាំងមុខតំណែងនេះដែរ មានប្រធាន អនុប្រធានការិយាល័យ៤រូប និងប្រធាន អនុប្រធាន មណ្ឌលសុខភាព៦រូបផងដែរ។ ក្នុងពិធីនេះដែរ លោក វ៉ា ថន អភិបាលរងខេត្តក្រចេះ ក៏បានសំណេះសំណាលជាមួយមន្រ្តីសុខាភិបាល និងលោកគ្រូ អ្នកគ្រូ ហើយលោកបានជំរុញឲ្យមន្រ្តីមន្ទីរសុខាភិបាល ក៏ដូចជាបុគ្គលិកពេទ្យទាំងអស់ ត្រូវគោរពវិជ្ជាជីវៈ និងមិនត្រូវរើសអើងចំពោះអ្នកជំងឺនោះទេ។ លោកបន្ដទៀតថា ធម្មតា អ្នកជំងឺតែងតែមានអារម្មណ៍មិនល្អ និយាយស្ដីមិនពិរោះ ហើយអ្នកជំងឺខ្លះមកពីជនបទ មិនសូវមានការយល់ដឹង ដូចច្នេះសូមលោកគ្រូ អ្នកគ្រូពេទ្យទាំងអស់ កុំប្រកាន់ និងត្រូវយកចិត្តទុកដាក់ក្នុងព្យាបាល៕ ប្រភពព័ត៌មាន: រដ្ឋបាលខេត្តក្រចេះ (ថ្ងៃទី ០៦ ខែមេសា ឆ្នាំ២០១៨)