ព្រឹកថ្ងៃពុធទី១១ ខែវិច្ឆិកា ឆ្នាំ២០២០ នៅបរិវេណមន្ទីរវប្បធម៍និងវិចិត្រសិល្ប: ក្នុងក្រុងក្រចេះ ឯកឧត្តម ឧត្តមសេនីយ៍ឯក ហ៊ុន ម៉ាណែត អគ្គមេបញ្ជាការរងនៃកងយោធពលខេមរភូមិន្ទ មេបញ្ជាការកងទ័ពជើងគោក តំណាងដ៏ខ្ពង់ខ្ពស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃកម្ពុជា បានអញ្ជេីញជាអធិតបតីដ៏ខ្ពង់ខ្ពស់ ចុះសាកសួរសុខទុក្ខនឹងបានចែកជូនពូជស្រូវជូនបងប្អូនប្រជាពលរដ្ឋដែលរងគ្រោះដោយសាទឹកជំនន់ទន្លេ នាពេលកន្លងមក មានស្រុកចំនួន០៤និងក្រុង១ ស្មើនឹង១៨ឃុំ ៣សង្កាត់ត្រូវនឹង៨០ភូមិ ស្មើនឹង២.៣៧២គ្រួសារ ដែលជាអំណោយដ៏ថ្លៃថ្លារបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ដេីម្បីជាដេីមទុនសម្រាប់ធ្វេីការដាំដុះឡើងវិញបន្ទាប់ពីរងនូវការខូចខាតដោយទឹកជំនន់ទឹកទន្លេមេគង្គក្នុងឆ្នាំ២០២០នេះ។
ដោយមានការអញ្ជើញចូលរួមពីសំណាក់ ឯកឧត្តម ហឿ សុីយ៉ែម ប្រធានក្រុមប្រឹក្សាខេត្ត ឯកឧត្តម វ៉ា ថន អភិបាលខេត្ត ឯកឧត្តម លោកជំទាវប្រតិភូអមដំណើរ ឯកឧត្តមប្រធានក្រុមការងាររាជរដ្ឋាភិបាលចុះមូលដ្ឋានខេត្តក្រចេះ លោក លោកស្រី ប្រធានមន្ទីរអង្គភាពជុំវិញខេត្ត និងប្រជាពលរដ្ឋរងគ្រោះផងដែរ។
ឯកឧត្តម វ៉ា ថន អភិបាលខេត្តក្រចេះ និងប្រធានគណ:កម្មាធិការគ្រប់គ្រងគ្រោះមហន្តរាយខេត្ត បានបញ្ជាក់ឲ្យដឹងថាឆ្នាំ២០២០ នេះទឹកទន្លេមេគង្គក្នុងខេត្ត បានចាប់ផ្ដើមឡើងបន្តិចម្ដង បន្តិចម្ដងចាប់ពីដើមខែសីហា ដោយទឹកមានឡើងដល់កម្ពស់កម្រិតអតិបរិមាកម្ពស់១៩.០៥ ម៉ែត្រនៅថ្ងៃ២១ ខែតុលា ឆ្នាំ២០២០ បានធ្វើឲ្យប៉ះពាល់និងខូចខាត ផ្លូវលំជនបទ ទំនប់.ប្រឡាយផលដំណាំជាពិសេស ប៉ះពាល់ដំណាំស្រូវចំនួន ២.២៧៥,២៧ ហិកតា (២២មុឺនប្រាំពីរពាន់ប្រាំរយម្ភៃប្រាំពីរហ.ត) ក្នុងនោះខូចខាតទាំងស្រុងចំនួន១.៧០៤,៥៧ហិកតា (មួយមុឺនប្រាំពីរពាន់បួនរយហាប្រាំពីហ.ត) និងដំណាំរួមផ្សំចំនួន ៩៥,៧៥ ហ.ត។
នៅក្នុងឱកាសនោះឯកឧត្តម ហ៊ុន ម៉ាណែត មានប្រសាសន៍ ផ្ដាំផ្ញើការសាកសួរសុខទុក្ខពីសំណាក់សម្ដេចតេជោ ហ៊ុន សែន នាយករដ្ឋមន្ត្រី ដែលសម្ដេចតែងតែគិតគូរពីសុខទុក្ខប្រជាពលរដ្ឋរងគ្រោះ ដោយសារទឹកជំនន់ ដោយមិនទុកឲ្យប្រជាពលរដ្ឋណាម្នាក់ អត់អាហារស្លាប់ដោយពុំបានដឹងឮពីអាជ្ញាធរនោះឡើយ។ រាជរដ្ឋាភិបាលកម្ពុជា បានខិតខំយ៉ាងប្ដូរផ្ដាច់ ដើម្បីអនុវត្តយុទ្ធសាស្ត្រកំណែទម្រង់ស៊ីជម្រៅ និងអភិវឌ្ឍលើគ្រប់វិស័យ ជាពិសេសវិស័យកសិកម្ម ឧស្សាហកម្ម ដែលកំពុងតែដើរតួរនាទីយ៉ាងសំខាន់ ក្នុងការជំរុញការអភិវឌ្ឍសង្គម និងសេដ្ឋកិច្ចជាតិ រក្សានៅសន្តិសុខស្បៀងអាហារជូនប្រជាជនកម្ពុជា នឹងកាត់បន្ថយភាពក្រីក្រ របស់ប្រជាពលរដ្ឋ ក្នុងពេលប្រយុទ្ធប្រឆាំងជំងឺកូវីដ-១៩ រួមទាំងដោះស្រាយបញ្ហាប្រឈមពីគ្រោះទឹកជំនន់ផងដែរ។
បងប្អូនប្រជាកសិករទាំង២.៣៧២ គ្រួសារ ក្នុងមួយគ្រួសារទទួលបានស្រូវពូជ ចំនួន១០០គីឡូក្រាម និងថវិកា ចំនួន១០ម៉ឺនរៀល ដើម្បីស្តារឡើងវិញបន្ទាប់ពីរងការខូចខាតដោយទឹកជំនន់ទន្លេមេគង្គ។
គួរបញ្ជាក់ថា បន្ទាប់ពីទទួលរងឥទិ្ធពលព្យុះ និងភ្លៀងធ្លាក់ខ្លាំងរយៈពេលកន្លងទៅ ក្នុងភូមិសាស្រ្តខេត្តក្រចេះ បានទទួលរងគ្រោះនូវទឹកជំនន់ទន្លេមេគង្គតាមបណ្តាក្រុង ស្រុក បានធ្វើឱ្យប៉ះពាល់ប្រជាពលរដ្ឋចំនួន៣ស្រុក/១ក្រុង ក្នុងនោះរួមមាន ស្រុកចិត្របុរី ស្រុកឆ្លូង ស្រុកព្រែកប្រសព្វ និងក្រុងក្រចេះ៕
ប្រភព៖ រដ្ឋបាលខេត្តក្រចេះ
