ខេត្តកំពង់ចាម៖ ឯកឧត្តម នាយឧត្តមសេនីយ៍ គន់ គីម ទេសរដ្ឋមន្ត្រី ទទួលបន្ទុកបេសកកម្មពិសេស និងជាអនុប្រធានទី១ គណៈកម្មាធិការជាតិគ្រប់គ្រងគ្រោះមហន្តរាយ ឯកឧត្តម យូ ស៊ុនឡុង រដ្ឋមន្ត្រីប្រតិភូអមនាយករដ្ឋមន្ត្រី អមដំណើរដោយឯកឧត្តម អ៊ុន ចាន់ដា អភិបាលនៃគណៈអភិបាលខេត្តកំពង់ចាម នាថ្ងៃទី០៩ ខែវិច្ឆិកា ឆ្នាំ២០២០ បានចុះពិនិត្យទីតាំង និងត្រៀមប្រជុំពិភាក្សាផែនការបែងចែកភារកិច្ចរៀបចំពិធីសំណេះសំណាល និងចែកពូជស្រូវ ជូនប្រជាពលរដ្ឋដែលទទួលរងផលប៉ះពាល់ដោយជំនន់ទឹកភ្លៀង ក្នុងខេត្តកំពង់ចាម ដើម្បីស្តារផលិតកម្មស្បៀងឡើងវិញ ក្រោយពេលទឹកស្រក។
ពិធីសំណេះសំណាល និងចែកពូជស្រូវគ្រោងនឹងប្រព្រឹត្តទៅនាថ្ងៃទី១២ ខែវិច្ឆិកា ឆ្នាំ២០២០ខាងមុខ ក្រោមអធិបតីភាពឯកឧត្តម ឧត្តមសេនីយ៍ឯក ហ៊ុន ម៉ាណែត អគ្គមេបញ្ជាការរងកងយោធពលខេមរភូមិន្ទ និងជាមេបញ្ជាការកងទ័ពជើងគោក តំណាងដ៏ខ្ពង់ខ្ពស់ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា នៅបរិវេណវិទ្យាល័យហ៊ុនសែន ព្រៃទទឹង ឃុំជ្រៃវៀន ស្រុកព្រៃឈរ ចំនួន៣២០០គ្រួសារ។
គួរបញ្ជាក់ថា បន្ទាប់ពីទទួលរងឥទិ្ធពលព្យុះ និងភ្លៀងធ្លាក់ខ្លាំង នៅអំឡុងដើមខែតុលា ឆ្នាំ២០២០ តាមបណ្តាស្រុកមួយចំនួន នៅក្នុងខេត្តកំពង់ចាម បានទទួលរងផលប៉ះពាល់ដោយសារ ជំនន់ទឹកភ្លៀង ដែលប៉ះពាល់លើដំណាំស្រូវរបស់ប្រជាកសិករ ចំនួន ២.៩០៤ហិចតា ស្មើនឹង៣.៩៣២គ្រួសារ ក្នុងនោះ ខូចខាតចំនួន ១.៩៦៧ហិចតា ស្មើនឹង៣.២០០គ្រួសារ និងបានប្រសើរឡើងវិញចំនួន៩៣៧ហិចតា ស្មើនឹង ១.១៥៣ គ្រួសារ។ តាមរយៈគណៈកម្មាធិការជាតិគ្រប់គ្រងគ្រោះមហន្តរាយ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានឧបត្ថម្ភស្រូវពូជ ចំនួន ៣២០តោន សម្រាប់ការស្ដារឡើងវិញ ចំនួន ១.៩៦៧ហិចតា នៅស្រុកបាធាយ ស្រុកជើងព្រៃ ស្រុកព្រៃឈរ ស្រុកកំពង់សៀម និងស្រុកស្ទឹងត្រង់ ចំនួន ៣២០០គ្រួសារ៕
ប្រភព៖ រដ្ឋបាលខេត្តកំពង់ចាម