កំពង់ឆ្នាំង៖ នៅព្រឹកថ្ងៃព្រហស្បតិ៍ ៥រោច ខែចេត្រ ឆ្នាំរកា នព្វស័ក ព.ស២៥៦១ ត្រូវនឹងថ្ងៃទី៥ ខែមេសា ឆ្នាំ២០១៨ នៅសាលប្រជុំ«គ»សាលាខេត្តកំពង់ឆ្នាំង បានដំណើរការកិច្ចប្រជុំផ្សព្វផ្សាយផែនការសកម្មភាព និងថវិកាឆ្នាំ២០១៨ ខេត្តកំពង់ឆ្នាំង ស្ដីពីការអនុវត្តគម្រោងបែងចែកដីដើម្បីសង្គមកិច្ច និងការអភិវឌ្ឍន៍សេដ្ឋកិច្ច ជំហាន២ ( LASED II ) ក្រោមអធិបតីភាព លោក អៀង វុធ អភិបាលរងខេត្តកំពង់ឆ្នាំង។ នៅក្នុងកិច្ចប្រជុំផ្សព្វផ្សាយនោះដែរ ក៏មានការអញ្ជើញចូលរួមពីលោក អម សុភា ប្រធានគម្រោងLASED II ប្រចាំខេត្តកំពង់ឆ្នាំង មន្ត្រីគម្រោងថ្នាក់ជាតិ មន្ត្រីគម្រោងថ្នាក់ខេត្ត មន្ត្រីគម្រោងថ្នាក់ស្រុក មន្ត្រីការិយាល័យបច្ចេកទេសស្រុក មន្ត្រីថ្នាក់ឃុំ និងតំណាងអង្គការសង្គមស៊ីវិលសរុបប្រមាណ៤១នាក់។ ក្នុងឱកាសនោះផងដែរ លោកអម សុភា ប្រធានគម្រោងប្រចាំខេត្តបានលើកឡើងថា គោលបំណងអភិវឌ្ឍន៍គម្រោង គឺដើម្បីជួយលើកកម្ពស់លទ្ធភាពសម្បទានិកដែលជាអ្នកទទួលផល នៃគោលដៅរបស់គម្រោងលើធនធានកសិកម្ម ហេដ្ឋារចនាសម្ពន្ធ និងសេវាកម្ម ដែលបានជ្រើសរើសក្នុងសហគមន៍តាមរយៈ ពង្រឹងក្រុមសហគមន៍ដើម្បីអាចធ្វើការកំណត់ និងចាត់អាទិភាពបាននូវបច្ចេកទេសសមស្របក្នុងការគាំទ្រ និងការវិនិយោគលើហេដ្ឋារចនាសម្ពន្ធសហគមន៍ ផ្ដល់អាទិភាពហិរញ្ញវត្ថុលើផលិតកម្ម និងការបង្កើនរចនាសម្ព័ន្ធសហគមន៍ និងធ្វើការពង្រីកបន្ថែមសកម្មភាពគាំទ្រលើវិស័យកសិកម្ម និងការលើកកម្ពស់ជីវភាពសហគមន៍។ បន្ថែមពីលើនេះ លោកប្រធានគម្រោង ក៏បានអានរបាយការណ៍សង្ខេបអំពីវឌ្ឍនភាពគម្រោងដែលរួមមាន៖ ការងាររដ្ឋបាលគម្រោង និងការគ្រប់គ្រងធនធានមនុស្ស ការងារបណ្ដុះបណ្ដាលសមត្ថភាព និងប្រជុំទិសដៅការងារ ការងារដីធ្លី និងមុខសញ្ញាអ្នកទទួលដី ការរៀបចំបង្កើតរចនាសម្ព័ន្ធភូមិ ការងារគាំទ្រលើហេដ្ឋារចនាសម្ពន្ធ និងសេវាកម្មសហគមន៍ ការងារគាំទ្រសេវាកម្មកសិកម្ម និងប្រព័ន្ធស្រោចស្រព និងបញ្ហាប្រឈម និងដំណោះស្រាយផងដែរ។ មានមតិសំណេះសំណាលនាឱកាសនោះ ឯកឧត្តម អៀង វុធ អភិបាលរងខេត្ត ដោយផ្អែកលើរបាយការណ៍វឌ្ឍនភាពគម្រោង ក៏បានថ្លែងនូវការកោតសរសើរដល់ក្រុមការងារដែលបាននឹងកំពុងសស្រាក់សស្រាំបំពេញការងាររហូតសម្រចបានលទ្ធផលល្អប្រសើរតាមផែនការសកម្មភាពដែលបានគ្រោងទុក ។ទន្ទឹមនោះ បើទុកណាមានបញ្ហាប្រឈមដែលពាក់ព័ន្ធនឹងការអនុម័តផែនការសកម្មភាព និងថវិកាឆ្នាំ២០១៨ បន្តិចមែន ក៏ក្រុមការងារបានអនុវត្តសកម្មាភាពរបស់រដ្ឋបាលខេត្តមានដំណើរការធម្មតា។ ជាទីបញ្ចប់ឯកឧត្តមអភិបាលរងខេត្ត បានប្រសិទ្ធពរជ័យសិរីសួស្ដីមហាប្រសើរ ក្នុងឱកាសបុណ្យឆ្នាំថ្មី ឆ្នាំច សំរឹទ្ធិស័ក ព.ស២៥៦២ ដែលនឹងមកដល់នាពេលមុខនេះ និងសូមឲ្យសមប្រកបតែពុទ្ធពរបួនប្រការគឺអាយុ វណ្ណៈ សុខៈ និងពលៈកុំបីឃ្លៀងឃ្លាតឡើយ។ ប្រភពព័ត៌មាន: រដ្ឋបាលខេត្តកំពង់ឆ្នាំង