នៅព្រឹកថ្ងៃព្រហស្បតិ ៥រោច ខែចេត្រ ឆ្នាំរកា នព្វស័ក ព.ស ២៥៦១ ត្រូវនឹងថ្ងៃទី០៥ ខែមេសា ឆ្នាំ២០១៨ ឯកឧត្តម ងី ច័ន្ទ្រផល រដ្ឋលេខាធិការក្រសួងមហាផ្ទៃ អមដំណើរដោយអនុរដ្ឋលេខាធិកា តំណាងអគ្គនាយកដ្ឋាន អគ្គាធិការដ្ឋាន ក្រសួងមហាផ្ទៃ និងឯកឧត្តម ថង សាវុន អភិបាលខេត្តរតនគិរី បានអញ្ជើញចុះសំណេះសំណាល និងសួរសុខទុក្ខកម្លាំងនគរបាលការពារព្រំដែន នៃវរៈនគរបាលតូចលេខ ៦២៣ និង២០៣ ដែលកំពុងឈរជើងនៅតាមបណ្តោយខ្សែបន្ទាត់ព្រំដែនកម្ពុជា-វៀតណាម ក្នុងភូមិសាស្ត្រស្រុកអណ្តូងមាស អូរយ៉ាដាវ និងស្រុកតាវែង នៃខេត្តរតនគិរី ។
ឯកឧត្តមរដ្ឋលេខាធិការក្រសួងមហាផ្ទៃ និងឯកឧត្តមអភិបាលខេត្ត បាននាំមកនូវបណ្តាំផ្ញើសាកសួរសុខទុក្ខពីសំណាក់សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងការជូនពរសម្រាប់ឱកាសបុណ្យចូលឆ្នាំថ្មី ប្រពៃណីជាតិ ជូនចំពោះកងកម្លាំងទាំងអស់ ព្រមទាំងសម្តែងនូវការកោតសរសើរនូវវរៈភាពដ៏អង់អាចក្លាហាននូវក្នុងបុព្វហេតុបូរណភាពទឹកដី អធិបតេយ្យភាពជាតិ មាតុភូមិ ដោយពុំខ្លាចនឿយហត់ ខណៈដែលជនមួយចំនួនបែរជាបំផុសបំផុល ប្រឌិតព័ត៌មាន និងសន្យាកាត់ទឹកដីឲ្យបរទេសទៅវិញ ។
ឯកឧត្តមបន្តថា ការផ្សាភ្ជាប់ទំនាក់ទំនងរវាងសមរភូមិមុខ និងសមរភូមិក្រោយមានសារៈសំខាន់ដូចគ្នា ហើយជានិច្ចជាកាលថ្នាក់ដឹកនាំជាតិតែងតែយកចិត្តទុកដាក់នៅក្នុងការរៀបចំផែនការរក្សាសនណ្តាប់ធ្នាប់សាធារណៈ ផែនការការពារជាតិ និងការផ្គត់ផ្គង់កម្លាំងសមរភូមិមុខ ។ ក្នុងឱកាសនេះដែរ ឯកឧត្តមរដ្ឋលេខាធិការ និងបានចែកជូននូវគ្រឿងឧបភោគបរិភោបមួយចំនួនជូនដល់វរៈនគរបាលទាំងពីរដែលជាអំណោយរបស់សម្តេចក្រឡាហោម ព្រមទាំងថ្នាក់ដឹកនាំគ្រប់ជាន់ថ្នាក់នៃក្រសួង និងឯកឧត្តមអភិបាលខេត្ត ក្នុងនោះក៏បានឧបត្ថម្ភថវិកាជូនកម្លាំងវរៈនគរបាលទាំងពីរ សរុប ២៨២នាក់ ក្នុងម្នាក់ៗថវិកា ៥០,០០០៛ ផងដែរ ។
ប្រភពព័ត៌មាន: រដ្ឋបាលខេត្តរតនគិរី (ថ្ងៃទី ០៥ ខែមេសា ឆ្នាំ២០១៨)
