ឯកឧត្តម ញ៉ែម សំអឿន អភិបាលខេត្តស្តីទី នាព្រឹកថ្ងៃច័ន្ទ ៣ កើត ខែចែត្រ ឆ្នាំរកា នព្វស័ក ព.ស ២៥៦១ ត្រូវនឹងថ្ងៃទី ១៩ ខែមីនា ឆ្នាំ២០១៨ បានអញ្ជើញជាអធិបតីភាពបើកកិច្ចប្រជុំស្តីពី ការផ្សព្វផ្សាយប្រើប្រាស់ពិន្ទុវិស័យ ឯកសារស្ថានភាពសេដ្ឋកិច្ច សង្គមកិច្ច និងការណែនាំអំពីការប្រមូលតម្រូវការគម្រោងអាទិភាព សម្រាប់រៀបចំកសាងកម្មវិធីវិនិយោគបីឆ្នាំរំកិល (២០១៩-២០២១) របស់រដ្ឋបាលខេត្តរតនគិរី ដែលពិធីនេះប្រារព្ធធ្វើឡើងនៅសាលប្រជុំសាលាខេត្តរតនគិរី ។ ថ្លែងក្នុងពិធីបើកកិច្ចប្រជុំ ឯកឧត្តមអភិបាលខេត្តស្តីទី មានប្រសាសន៍ថា ការប្រមូលគម្រោងអាទិភាព សម្រាប់រៀបចំ និងកសាងកម្មវិធីវិនិយោគបីឆ្នាំរំកិល (២០១៩-២០២១) របស់រដ្ឋបាលខេត្ត វាពិតជាមានសារៈសំខាន់ណាស់ ដើម្បីឲ្យមន្ទីរ អង្គភាពជំនាញ អាជ្ញាធរក្រុង ស្រុក អង្គការសង្គមស៊ីវិល និងភាគីពាក់ព័ន្ធនានា ធ្វើការវិភាគទៅលើឯកសារព័ត៌មានស្ថានភាព សេដ្ឋកិច្ច សង្គមកិច្ច និងពិន្ទុវិស័យ ដែលជាធាតុចូលសម្រាប់ការកសាងកម្មវិធីវិនិយោគបីឆ្នាំរំកិលរបស់ខេត្ត ។ ដូច្នេះភាគីពាក់ព័ន្ធត្រូវពិនិត្យទៅលើសូចនាករដែលមានបញ្ហាប្រឈមខ្ពស់ ត្រូវយកមកដោះស្រាយសម្រាប់ឆ្នាំទី១ គឺឆ្នាំ២០១៩ និងធ្វើបច្ចុប្បន្នភាពចំពោះគម្រោងទាំងឡាយណាដែលមាននៅក្នុងកម្មវិធីវិនិយោគបីឆ្នាំរំកិល ដែលបានអនុម័តរួចកាលពីថ្ងៃទី២៧ ខែកុម្ភៈ ឆ្នាំ២០១៨ កន្លងមកសម្រាប់ជាមូលដ្ឋានក្នុងការជ្រើសរើសជាអាទិភាពអនុវត្តនៅឆ្នាំទី១ ។
ប្រភពព័ត៌មាន: រដ្ឋបាលខេត្តរតនគិរី (ថ្ងៃទី ១៩ ខែមីនា ឆ្នាំ២០១៨)