ថ្ងៃអាទិត្យ ២ កើត ខែចេត្រ ឆ្នាំរកា នព្វស័ក ពុទ្ធសករាជ ២៥៦១ ត្រូវនឹងថ្ងៃទី១៨ ខែមីនា ឆ្នាំ២០១៨ លោកជំទាវ មិថុនា ភូថង អភិបាល នៃគណ:អភិបាលខេត្តកោះកុង បានអញ្ជើញ ជាអធិបតីជាមួយឯកឧត្តម កាយ សំរួម ប្រធានក្រុមប្រឹក្សាខេត្តនិងលោកជំទាវ ក្នុងពិធីបុណ្យឆ្លងសាលាគណ សាលាតម្កល់សព និងពុទ្ធាភិសេក នៅវត្តជោត្តញ្ញាណ ភូមិបឹងឃុនឆាង សង្កាត់ស្មាច់មានជ័យ ក្រុងខេមរភូមិន្ទ ។ ដោយមានការចូលរួមពីលោកអភិបាលរងខេត្ត លោកនាយក នាយករង រដ្ឋបាលសាលាខេត្ត លោកអភិបាលក្រុង លោក លោកស្រីប្រធានមន្ទីរ អង្គភាព លោកយាយ លោកតា ព្រមទាំងប្រជាពុទ្ធបរិស័ទ លោកគ្រូ អ្នកគ្រូ និងសិស្សានុសិស្ស។ លោកជំទាវ បានលើកឡើងថា ដោយសារមានសន្តិភាព ស្ថិរភាព មានការអភិវឌ្ឍន៍ លើគ្រប់វិស័យ វិស័យពុទ្ធចក្រមានការរីកចម្រើនទូទាំងប្រទេស សមិទ្ធផលថ្មីៗរួមមាន សាលាគណ សាលាបាលី កុដិថ្មវែង២ជាន់ កុដិព្រះគ្រូមេគណ អណ្ដូងទឹក ស្រះទឹក របង និងក្លោងទ្វារ ទុកប្រើប្រាស់ជាប្រយោជន៍របស់ពុទ្ធបរិស័ទទាំងអស់និងសូមបន្តជួយថែរក្សា អោយបានគង់វង្ស យូអង្វែងតរៀងទៅតំកល់ទុកក្នុងវិស័យព្រេះពុទ្ធសាសនា ដែលជាតម្លៃលេចធ្លោមិនអាចកាត់ថ្លៃបាន។ ក្នុងនាមអជ្ញាធរខេត្ត សូមគាំទ្រគ្រប់បែបយ៉ាង ដល់គំនិតផ្ដួចផ្ដើមកសាង កែលម្អនូវសមិទ្ធិផលនានា ដើម្បីតម្រូវការក្នុងវត្ត ដែលប្រជាពុទ្ធបរិស័ទ មកពីគ្រប់ទិសទី មកធ្វើបុណ្យសន្សំកុសល និងប្រារព្វពិធីនានា តាមបែបប្រពៃណី ទំនៀមទំលាប់សាសនា ជាទីសក្ការ:បូជាសម្រាប់បងប្អូនប្រជាពុទ្ធបរិស័ទ៕

ប្រភពព័ត៌មាន: រដ្ឋបាលខេត្តកោះកុង