ថ្ងៃទី១០ ខែកញ្ញា ឆ្នាំ២០២០ ដែលជាឱកាសនៃការប្រារព្ធពិធីបុណ្យភ្ជុំបិណ្ឌប្រពៃណីព្រះពុទ្ធសាសនា ក្នុងកម្មវិធីដែលបានគ្រោងទុក រដ្ឋបាលខេត្តសៀមរាប ត្រូវបានទទួលកាន់វេនទី៨ នៅវត្តប្រាសាទគោកចក ភូមិវាល សង្កាត់គោកចក ក្រុង ខេត្តសៀមរាប ដោយមានការអញ្ជើញពីឯកឧត្តម តោ គិមស៊ាន សមាជិកក្រុមប្រឹក្សាខេត្ត តំណាង ឯកឧត្ដម អ៉ឹង ហឿន ប្រធានក្រុមប្រឹក្សាខេត្ត និងលោក លី សំរិទ្ធ អភិបាលរងខេត្ត តំណាងឯកឧត្ដម ទៀ សីហា អភិបាល នៃគណៈអភិបាលខេត្តសៀមរាប និងមានការចូលរួមពី ឯកឧត្តមលោកជំទាវ សមាជិក សមាជិកាក្រុមប្រឹក្សាខេត្ត គណៈអភិបាលខេត្តអស់លោក លោកស្រីថ្នាក់ដឹកនាំមន្ទីរ-អង្គភាពជុំវិញខេត្ត បានអញ្ជើញចូលរួមដោយទឹកចិត្តជ្រះថ្លានៅក្នុងពិធីកាន់បិណ្ឌនេះ និងបាននាំយកទ័យ្យវត្ថុ គ្រឿងឧបភោគបរិភោគមួយចំនួន និងបច្ច័យប្រគេនចំពោះព្រះសង្ឃ សម្រាប់ប្រើប្រាស់ក្នុងឱកាសកាន់ព្រះវស្សានេះ ព្រមទាំងយាយជី-តាជី ឧបាសក ឧបាសិកាក្នុងវត្ថផងដែរ។
បុណ្យភ្ជំបិណ្ឌ គឺជាបុណ្យដែលត្រូវបានប្រារព្ធឡើងតាមរដូវកាលកំណត់ ជាបុណ្យដែលអនុលោមតាមពុទ្ធប្បញ្ញត្តិផង និងពុទ្ធានុញ្ញាតិផង កប់ជ្រៅក្នុងជំនឿនៃពុទ្ធបរិស័ទ ព្រមទាំងបានក្លាយជាប្រពៃណីទំនៀមទំលាប់របស់ប្រជាពលរដ្ឋខ្មែរ គោរពប្រតិបត្តិតាំងពីដូនតាតរៀងមក។ នាឱកាសនោះ ឯកឧត្ដម សមាជិកក្រុមប្រឹក្សាខេត្ត បានលើកឡើងថាពិធីកាន់វេនបិណ្ឌនេះ ពុទ្ធសាសនិកជនខ្មែរ ត្រូវបានប្រារព្ធបដិបត្តិធ្វើឡើងចាប់ពីថ្ងៃ១រោច ដល់ថ្ងៃ១៤រោច ខែភទ្របទ និងត្រូវប្រារព្ធថ្ងៃបុណ្យភ្ជំបិណ្ឌធំ ត្រូវថ្ងៃ១៥រោច ខែភទ្របទ ហើយរដ្ឋបាលខេត្តបានកំណត់កម្មវិធីរបស់ខ្លួន ចូលរួមជាមួយប្រជាពុទ្ធបរិស័ទតាមទីអារាមនានា គ្រប់បណ្តាថ្ងៃសំខាន់ៗទាំងអស់នោះ ដោយការជួបជុំគ្នានាំយកនូវចង្ហាន់ ទ័យ្យវត្ថុ និងបច្ច័យផងដែរ ទៅវេរប្រគេនចំពោះព្រះសង្ឃតាមសទ្ធជ្រះថ្លារៀងៗខ្លួន រួមមានពិធីបង្សុកូល រាប់បាត្រព្រះសង្ឃ ឧទ្ទិសកុសលផលបុណ្យជូនដល់ដួងវិញ្ញាណក្ខ័ន្តអ្នកមានគុណ មានមាតាបិតា ជីដូនជីតា និង ញាតិការទាំង៧សណ្តាន ដែលបានចែកឋានទៅកាន់បរលោកខាងមុខនោះ ព្រមទាំងឧទ្ទិសដល់ដួងវិញ្ញាណក្ខន្ធដល់កម្មាភិបាល យុទ្ធជន ដែលបានពលីជីវិត ក្នុងបុព្វហេតុការពារកសាង អភិវឌ្ឍន៍ជាតិមាតុភូមិកម្ពុជា។
ឯកឧត្តមបានបញ្ជាក់ថា អ្វីៗទាំងអស់ដែលប្រទេសជាតិកំពុងទទួលបានពីការអភិវឌ្ឍប្រជាពលរដ្ឋកំពុងទទួលបាននូវការរីកចម្រើន និងសេចក្តីសុខក្សេមក្សាន្តគ្រប់ប្រការ គឺកើតចេញពីកត្តាសន្តិភាពដែលមានសម្តេចតេជោ ហ៊ុន សែន ជាស្ថាបនិកដោយការដាក់អាយុជីវិតជាដើមទុន ក្នុងនោះដែរក៏បានធ្វើឲ្យវិស័យព្រះពុទ្ធចក្រមានការរីកចម្រើន ដើរទន្ទឹមគ្នាជាមួយវិស័យអាណាចក្រ។ ជាការរំលឹកនោះដែរថា សុខភាពក៏ជាកត្តាយ៉ាងសំខាន់ផងដែរ ក្នុងការជម្រុញឲ្យមាននិរន្តរភាពលើការងារអភិវឌ្ឍន៍។ កម្ពុជាពិតជាមានមោទនភាពខ្លាំងណាស់ ដែលមានប្រមុខដឹកនាំដ៏ឈ្លាសវៃក្នុងការដឹកនាំគ្រប់គ្រងប្រទេសជាតិ ឲ្យបានស្ថិតក្នុងស្ថានភាពមួយដែលអាចទប់ទល់បានជាមួយវិបត្តិកូវីត១៩ ខណៈពេលដែលពិភពលោកកំពុងទទួលនូវការកៀបសង្កត់យ៉ាងធ្ងន់ធ្ងរដោយជម្ងឺកូវីត១៩ ។ថ្វីបើប្រទេសកម្ពុជាស្ថិតក្នុងស្ថានភាពធូរស្រាលនៃបញ្ហាកូវិត១៩យ៉ាងណាក៏ដោយ ដែលក្នុងកាលៈទេសៈនេះ រាជរដ្ឋាភិបាលបានអនុញ្ញាតិប្រជាពុទ្ធសបរិស័ទ ប្រើប្រាស់ឱកាសនេះបានប្រារព្ធបុណ្យភ្ជុំបិណ្ឌ ក៏ប៉ុន្តែជាស្មារតីនិងការយល់ដឹងរបស់ប្រជាពលរដ្ឋ គឺមិនអាចឃ្លាតឆ្ងាយបាននោះទេ ពីការអនុវត្តក្រោមការណែនាំរបស់ក្រសួងសុខាភិបាល លាងដៃ ពាក់ម៉ាស និង រក្សាគម្លាតសុវត្ថិភាព ៕
ប្រភព៖ រដ្ឋបាលខេត្តសៀមរាប