នាព្រឹកថ្ងៃពុធ ១៣រោច ខែផល្គុន ឆ្នាំរកា នព្វស័ក ព.ស ២៥៦១ ត្រូវនឹងថ្ងៃទី ១៤ មីនា ឆ្នាំ២០១៨ អាជ្ញាធរខេត្តរតនគិរី បានរៀបចំប្រារព្ធទិវាជាតិបង្ការ និងពន្លត់អគ្គិភ័យ លើកទី៣ ដែលពិធីនេះប្រារព្ធធ្វើឡើងនៅសាលមហោស្រពសម្តេចតេជោ នៃមន្ទីរវប្បធម៌ និងវិចិត្រសិល្បៈខេត្ត ក្រោមអធិបតីភាពឯកឧត្តម ថង សាវុន អភិបាលខេត្តរតនគិរី ។ លោកឧត្តមសេនីយ៍ទោ ងួន គឿន ស្នងការនគរបាលខេត្ត បានឲ្យដឹងថា នៅក្នុងឆ្នាំ២០១៧ ករណីអគ្គីភ័យកើតឡើងចំនួន ៣៦ លើក ធៀបជាមួយឆ្នាំ២០១៦ មានការកើនឡើងចំនួន ១៨លើក ប៉ុន្តែករណីខាងលើភាគច្រើនបណ្តាលមកពីភ្លើងឆេះព្រៃ មិនបណ្តាលឲ្យប៉ះពាល់អាយុជីវិតមនុស្សឡើយ និងមានការខូចខាតនូវផ្ទះសម្បែង សម្ភារៈ ថវិកាមួយចំនួន គិតជាទឹកប្រាក់សរុប ប្រមាណ ៥០ ម៉ឺនដុល្លារ ។ ឯកឧត្តម ថង សាវុន អភិបាលខេត្តរតនគិរី មានប្រសាសន៍លើកឡើងថា បច្ចុប្បន្ននៅក្នុងខេត្តមានការរីកចម្រើនផ្នែកហេដ្ឋារចនាសម្ព័ន្ធ ពិសេសសណ្ឋាគារ ផ្ទះសំណាក់ សំណង់អគាររដ្ឋ ឯកជនផ្សេងៗ មានកម្ពស់ខ្ពស់ៗ អាស្រ័យដោយជីវភាពប្រជាពលរដ្ឋមានការកើនឡើង ក្រោមការដឹកនាំរបស់សម្តេចតេជោនាយករដ្ឋមន្ត្រី ។ ទន្ទឹមនឹងការអភិវឌ្ឍនេះ តម្រូវការប្រើប្រាស់ចរន្តអគ្គិសនីកាន់តែខ្ពស់ក៏ក្លាយទៅជាបញ្ហាកង្វល់ប្រឈមទៅនឹងហានិភ័យនៃគ្រោះអគ្គិភ័យ ដែលទាមទារឲ្យគ្រប់ភាគីត្រូវមានវិធានការបង្ការ និងទប់ស្កាត់ឲ្យបានទាន់ពេលវេលានូវករណីអគ្គិភ័យណាមួយដែលបានកើតឡើង ។ ឯកឧត្តមលើកឡើងបន្តថា អង្គភាពជំនាញត្រូវធ្វើការត្រួតពិនិត្យឡើងវិញនូវសហគ្រាស សិប្បកម្ម ស្ថានីយ៍ប្រេងឥន្ទៈ និងនៅតាមគេហដ្ឋាន តម្រូវឲ្យមានឧបករណ៍សង្គ្រោះបឋមនៅគ្រប់ទីតាំង ជាងនេះទៅទៀតមន្ត្រីជំនាញត្រូវផ្សព្វផ្សាយឲ្យបានទូលំទូលាយនូវមធ្យោបាយទំនាក់ទំនងសម្រាប់ការអន្តរាគមន៍សង្គ្រោះ និងត្រូវបណ្តុះបណ្តាលសមត្ថភាពដល់មន្ត្រីជំនាញបន្ថែមទៀត ដើម្បីឆ្លើយតបទៅនឹងកំណើននៃតម្រូវការ នៃការវិវឌ្ឍនៃសង្គមជាតិ ។ ឯកឧត្តមអភិបាលខេត្ត ក៏ស្នើឲ្យបងប្អូនប្រជាពលរដ្ឋ ពិសេសអាជីវករនៅទីប្រជុំជន សូមចូលរួមសហការជាមួយអាជ្ញាធរ រៀបចំសណ្តាប់ធ្នាប់ របៀបរៀបរយ ដោយមានផ្លូវទូលាយសម្រាប់រថយន្តសង្គ្រោះអាចចូលបាន ជាពិសេសមិនអាចខ្វះបានឡើយនូវឧបករណ៍បំពង់ពន្លត់អគ្គីភ័យ និងវិធីនៃការប្រើប្រាស់ សម្រាប់សង្គ្រោះបឋមមុខពេលឡានទឹកទៅដល់ ។
ប្រភពព័ត៌មាន: រដ្ឋបាលខេត្តរតនគិរី (ថ្ងៃទី ១៤ ខែមីនា ឆ្នាំ២០១៨)
