ខេត្តសៀមរាប នៅតែមានអត្រាភ្ញៀវទេសចរច្រើនជាងគេ រហូតដល់២១៤ ០៤៧នាក់ ក្នុងរយៈពេល៥នៃថ្ងៃឈប់សម្រាក
រដ្ឋបាលខេត្តសៀមរាប សហភាពសហព័ន្ធយុវជនកម្ពុជា និងក្រុមការងាររៀបចំកម្មវិធីសម្រាកសៀមរាប សូមថ្លែងអំណរគុណយ៉ាងជ្រាលជ្រៅចំពោះភ្ញៀវទេសចរដែលបានអញ្ជើញមកចូលរួមទស្សនាកំសាន្តនៅតាមតំបន់នានាដែលខេត្តបានរៀបចំ តាមតំបន់ប្រាង្គប្រាសាទ និងតំបន់រម្យនីយដ្ឋាននានាក្នុងខេត្តសៀមរាប ព្រមទាំងបានអនុវត្តទៅតាមការណែនាំរបស់រដ្ឋបាលខេត្តនិងក្រសួងសុខាភិបាល ដើម្បីចូលរួមទប់ស្កាត់ការរីករាលដាលនូវជំងឺកូវីដ១៩បានយ៉ាងខ្ជាប់ខ្ជួន។
ម្យ៉ាងទៀត ក៏បានរួមចំណែកយ៉ាងល្អប្រសើរចំពោះការចូលរួមរក្សាអនាម័យ បរិស្ថាននៅតាមតំបន់កំសាន្ត និងសណ្តាប់ធ្នាប់ផងដែរក្នុងរយៈពេលឈប់សម្រាកចាប់ពីថ្ងៃទី១៧ ដល់ថ្ងៃទី២១ ខែសីហា ឆ្នាំ២០២០។
ជាមួយគ្នានេះ សូមបងប្អូនធ្វើដំណើរត្រឡប់ទៅស្រុកកំណើតវិញប្រកបដោយសុខសុវត្ថិភាពនិងចូលរួមគោរពច្បាប់ចរាចរណ៍ទាំងអស់គ្នា៕
ប្រភព៖ រដ្ឋបាលខេត្តសៀមរាប
