នៅរសៀលថ្ងៃទី១៥ ខែសីហា ឆ្នាំ២០២០ ឯកឧត្តម អ៊ុន ចាន់ដា អភិបាលនៃគណៈអភិបាលខេត្តកំពង់ចាម បានដឹកនាំឯកឧត្តមអភិបាលរងខេត្ត មន្ត្រីជំនាញមន្ទីរ អង្គភាពពាក់ព័ន្ធ អាជ្ញាធរក្រុងកំពង់ចាម ស្រុកកោះសូទិន បានអញ្ជើញចុះពិនិត្យការងារសាងសង់ច្រាំងទន្លេនៅក្រោយសាលាសង្កាត់កំពង់ចាម ក្រុងកំពង់ចាម និងការដ្ឋានសាងសង់ច្រាំងទន្លេនៅភូមិពង្រលិច ឃុំពង្រ ស្រុកកោះសូទិន ដែលរហូតមកទល់ពេលនេះ អនុវត្តបានប្រមាណ ៨០%។

      ក្នុងឱកាសនោះ ឯកឧត្តម អ៊ុន ចាន់ដា អភិបាលខេត្តកំពង់ចាម បានជំរុញឲ្យអ្នកទទួលការសាងសង់ធ្វើយ៉ាងណាត្រូវធានាគុណភាពសំណង់ និងគោរពតាមប្លង់បច្ចេកទេសអោយបានត្រឹមត្រូវ ហើយធ្វើអោយបានលឿន រួចរាល់មុនទឹកឡើងខាងមុខ។

      គួរបញ្ចាក់ថា ច្រាំងទន្លេនៅចំណុចទាំងពីរខាងលើ បានទទួលរងការបាក់ស្រុតកាលពីឆ្នាំកន្លងទៅ ដែលបានគំរាមកំហែងដល់អាគារសាលាសង្កាត់កំពង់ចាម និងហេដ្ឋារចនាសម្ព័ន្ធនៅជុំវិញនោះរួមមាន ផ្លូវកៅស៊ូ ជាដើម។ ដោយមើលឃើញនូវបញ្ហាប្រឈមខាងលើ ឯកឧត្តមអភិបាលខេត្តកំពង់ចាម បានដឹកនាំសាងសង់ច្រាំងទន្លេ ក្រោយសាលាសង្កាត់កំពង់ចាមប្រវែង៥៥ ម៉ែត្រ និងច្រាំងទន្លេនៅឃុំពង្រប្រវែង ៦០ម៉ែត្រ ដោយចំណាយថវិកាប្រចាំឆ្នាំរបស់រដ្ឋបាលខេត្តកំពង់ចាម និងបានបើកការដ្ឋានកាលពីថ្ងៃទី២៣ ខែមីនា ឆ្នាំ២០២០ ក្រោមអធិបតីភាពឯកឧត្តមអភិបាលខេត្ត និងឯកឧត្តមប្រធានក្រុមប្រឹក្សាខេត្ត៕

ប្រភព៖ រដ្ឋបាលខេត្តកំពង់ចាម