ដើម្បីផ្សារភ្ជាប់ទំនាក់ទំនងរវាងរដ្ឋាភិបាល ជាមួយប្រជាពលរដ្ឋ ក្នុងការសហការជុំវុញ លើកកំពស់ការទទួលខុសត្រូវ និងលើកកម្ពស់គណនយ្យភាពរបស់ក្រសួងស្ថាប័ន និងអាជ្ញាធរដ្ឋបាលថ្នាក់ក្រោមជាតិ ការផ្ដល់សេវាសាធារណៈ និងការអភិវឌ្ឍន៍នៅមូលដ្ឋានឱ្យមានប្រសិទ្ធភាព។ នៅព្រឹកថ្ងៃទី ៧ ខែសីហា ឆ្នាំ២០២០ នៅឃុំរលួសមានជ័យ ស្រុកសំបូរ បានរៀបចំវេទិការសាធារណៈ របស់ក្រុមការងាររាជរដ្ឋាភិបាល ចុះមូលដ្ឋានសំបូរ ដើម្បីត្រួតពិនិត្យ និងគាំទ្រការអនុវត្តកម្មវិធីនយោបាយ និងយុទ្ធសាស្ត្រចតុកោណដំណាក់កាលទី៤ របស់រាជរដ្ឋាភិបាលកម្ពុជា ក្រោមអធិបតីភាពឯកឧត្តម ម៉ី លីហួត អនុរដ្ឋលេខាធិការក្រសួង ធនធានទឹក និងឧុតនិយម និងជាប្រធានក្រុមការងារថ្នាក់ជាតិចុះជួយស្រុកសំបូរនិងឯកឧត្តម ស្រេង សុភាព អភិបាលរងខេត្ត ដោយមានអញ្ជើញចូលរូមពីឯកឧត្តម លោក លោកស្រី ជាសមាជិកក្រុមការងារ អាជ្ញាធរក្នុងមូលដ្ឋាន និងប្រជាពលរដ្ឋប្រមាណជា ១៥០នាក់។
មានប្រសាសន៍បើកអង្គវេទិការសាធារណៈនេះ ឯកឧត្ដម ម៉ី លីហួត បានលើកឡើងថា វេទិការសាធារណៈ របស់ក្រុមការងាររាជរដ្ឋាភិបាលចុះមូលដ្ឋាន មានគោលបំណង ស្ដាប់នូវកង្វល់ បញ្ហាប្រឈម ឬសំណូមពរ សំណើររបស់ប្រជាពលរដ្ឋ និងដោះស្រាយរាល់សំណូមពរ និងសំណើរទាំងនោះដោយផ្អែកទៅលើច្បាប់ និងលិខិតបទដ្ឋានគតិយុទ្ធនានា ក្នុងរណីមិនអាចដោះស្រាយបានក្រុមការងារ និងរាយការណ៍ជូនរដ្ឋាភិបាល តាមឋានានុក្រម។
ក្នុងវេទិការនោះដែល មានពលរដ្ឋស្នើសុំនិងលើកបញ្ហាមួយចំនួនរួមមាន៖ ទី១.ស្នើសុំជុសជុលដំបូលសាលារៀនមួយខ្នងនៅភូមិរលួសមានជ័យ ទី២.ស្នើសុំឲ្យជួសជុលផ្លូវ១ខ្សែនៅភូមិប៉ាក្លែរ
ទី៣.ប្រជាសហគមន៏ការងារព្រៃសហគមស្នើសុំកិច្ចសហការពីសមត្ថកិច្ចជំនាញក្នុងការបង្ក្រាប់បទល្មើសអោយបានទាន់ពេលវេលា។
ក្រោយពីបានស្តាប់នូវការលើកឡើងនិងស្នើសុំរបស់ពលរដ្ឋ ខាងមន្ទីរពាក់ពន្ឋ័បានបកស្រាយពន្យល់ជូនភ្លាមៗ និងមួយចំនួនទៀតទុកដោះស្រាយនៅខាងថ្នាក់លើ ហើយរាល់ការពន្យល់ ដោះស្រាយរបស់ក្រុមការងារប្រជាពលរដ្ឋក៏បានស្ដាប់និងទទួលយកដោយការសប្បាយចិត្ត។ ដោយឡែកចំពោះការស្នើសុំជួសជុលដំបូលសាលារៀន ក្រុមការងារចុះជួយឃុំរលួសមានជ័យ គឺមន្ទីរសេដ្ឋកិច្ច និងហិរញ្ញាវត្ថុខេត្តបានទទួលសំណើរនេះទៅសិក្សាវាយតម្លៃនិងធ្វើការជួសជុលជួន។
មានប្រសាសន៍បិទអង្គវេទិការឯកឧត្ដមបន្តថា អាជ្ញាធរដែនដីសមត្ថកិច្ចគ្រប់លំដាប់ថ្នាក់រួមនិងប្រជាពលរដ្ឋ រស់នៅក្នុងមូលដ្ឋានត្រូវតែធ្វើយ៉ាងណាអោយមូលដ្ឋាន ភូមិ.ឃុំយើងទទួលបានសុខសុវត្តិភាព មានការអភិវឌ្ឍន៏ អោយកាន់តែរីកចំរើនឡើងបន្ថែមទៀត ត្រូវខិតខំប្រឹងប្រែងបន្ថែមទៀតដើម្បីលុបបំបាត់អោយអស់នូវចំណុចអវិជ្ជមានទាំងឡាយ ដែលប្រជាពលរដ្ឋបានលើកឡើង-ខិតខំជួយដោះស្រាយរាល់ទុក្ខកង្វល់ បញ្ហាសុខភាព សន្តិសុខ សណ្ដាប់ធ្នាប់ ជាពិសេសសមត្ថកិច្ចទាំងអស់ត្រូវធ្វើការបង្ក្រាបបទល្មើស លួច ឆក់ ប្លន់ បទល្មើសគ្រឿងញៀន ស្របតាមគោលនយោបាយភូមិ ឃុំ មានសុវត្ថិភាព ឯកឧត្តម បានជម្រុញ ដល់បងប្អូនប្រជាពលរដ្ឋនៅតែបន្តទម្លាប់មានអនាម័យ និងចេះការពារខ្លួនឯង តាមរយៈការពាក់ម៉ាស ឬមានក្រមា មានទឹកអាគុលឬជែលនៅជាប់ខ្លួនជានិច្ច ព្រោះវិធានទាំងអស់នេះ សហគមន៍យើងនឹងគ្មានជម្ងឺកូវីដ ហើយប្រទេសកម្ពុជារបស់យើងនឹងយកឈ្នះកូវីត១៩ជាក់ជាពុំខាន៕
ប្រភព៖ រដ្ឋបាលខេត្តក្រចេះ