ព្រឹកថ្ងៃសុក្រ ទី០៧ ខែសីហា ឆ្នាំ២០២០ ឯកឧត្តម គង់ គឹមនី អភិបាលរងខេត្តក្រចេះ អញ្ជើញជាអធិបតីក្នុងកិច្ចប្រជុំគណៈកម្មាធិការជំរុញចលនាភូមិមួយផលិតផលមួយខេត្ត និងមានការចូលរួមពី លោក លោកស្រី ប្រធាន អនុប្រធានមន្ទីរ ជាសមាជិកគណៈកម្មាធិការជំរុញចលនាភូមិមួយផលិតផលមួយខេត្តផងដែរ។
ឯកឧត្តម គង់ គឹមនី អភិបាលរងខេត្ត មានប្រសាសន៍ថា៖ ខេត្តក្រចេះ ជាខេត្តគោលដៅមួយក្នុងចំណោមខេត្តទាំងប្រាំពីរ នៃការអនុវត្តចលនាភូមិមួយផលិតផលមួយ ដែលមានព្រំប្រទល់ខាងលិចទល់នឹងខេត្តកំពង់ធំ ខាងកើតទល់នឹងខេត្តមណ្ឌលគិរី និងប្រទេសវៀតណាម ខាងជើងទល់នឹងខេត្តស្ទឹងត្រែង និងខាងត្បូងទល់នឹងខេត្តត្បូងឃ្មុំ ដែលមានស្ថានភាពដីជាពីរប្រភេទធំៗគឺតំបន់ខ្ពង់រាប និងតំបន់ទំនាប ដែលសំបូរដោយធនធានធម្មជាតិ ប្រជាពលរដ្ឋនៅខេត្តក្រចេះមាន៨១.៤%គ្រួសារជាកសិករពឹងផ្អែកទំាងស្រុងលើវិស័យកសិកម្ម ដែលជាវិស័យចម្បងក្នុងការទ្រទ្រង់ជីវភាពរស់នៅរបស់ខ្លួន ដើម្បីលើកកំពស់ជីវភាព និងកាត់បន្ថយភាពក្រីក្ររបស់ប្រជាពលរដ្ឋ គណៈកម្មាធិការភូមិមួយផលិតផលមួយខេត្ត កំពុងសិក្សាកំណត់យកនូវផលិតផលសក្តានុពលមួយចំនួន ដើម្បីជំរុញផលិតផលទាំងនោះឲ្យក្លាយជា ភូមិមួយផលិតផលមួយ របស់ខេត្តមានដូចជា៖ នំក្រឡាន ផ្លែក្រូចថ្លុង រូបចម្លាក់វត្ថុអនុស្សាវរីយ ផលិតផលកែច្នៃពីដើមឬស្សី ផលិតផលកែច្នៃពីធាងដើមទ្រាំង តំបន់ទេសចរណ៍ធម្មជាតិជាដើម។
ឯកឧត្តម បន្តថា៖ តាមរយៈគោលនយោបាយស្តីពីការជំរុញចលនាភូមិមួយផលិតផលមួយ ត្រូវបានឆ្លើយតបទៅនឹងបំណងបា្រថ្នាតម្រូវការចាំបាច់ របស់ប្រជាកសិករក្នុងទូទាំងខេត្ត ដើម្បីបង្កើនផលិតកម្ម កែច្នៃវត្ថុធាតុដើម និងរកទីផ្សារទាំងក្នុងនិងក្រៅប្រទេស ធ្វើអោយប្រជាពលរដ្ឋមានចំណាប់អារម្មណ៍ និងយកចិត្តទុកដាក់យ៉ាងខ្លាំង ក្នុងការផលិតដោយគិតលើសោភ័ណ្ឌភាព គុណភាព និងទីផ្សារ ទាំងនេះជាកត្តាជម្រុញអោយប្រជាពលរដ្ឋបង្កើតមុខរបរ បង្កើតប្រាក់ចំណូល និងឈានដល់ការបន្ថយចំណាកស្រុក ស្របតាមគោលនយោបាយ យុទ្ធសាស្រ្ត ដឹកនាំរបស់រាជរដ្ឋាភិបាល សំដៅកាត់បន្ថយភាពក្រីក្ររបស់ប្រជាពលរដ្ឋ។ ហេតុនេះការងារជម្រុញចលនាភ១ផ១ខេត្ត ត្រូវការចាំបាច់នូវការចូលរួមគាំទ្រគ្រប់ភាគីពាក់ពន្ធ័គ្រប់លំដាប់ថ្នាក់ ពីថ្នាក់ជាតិរហូតដល់ថ្នាក់មូលដ្ឋាន និងអង្គការក្រៅរដ្ឋាភិបាល។
ក្នុងនោះដែល ឯកឧត្តមក៏បានជម្រុញឲ្យបន្តប្រជុំជាមួយអនុគណៈកម្មការថ្នាក់ក្រុង/ស្រុក ដើម្បីពង្រឹងការងារអោយកាន់តែមានប្រសិទ្ធភាពបន្ថែមទៀត -បន្តផ្សព្វផ្សាយកម្រងសំនួរប្រមូលព័ត៌មាន ទិន្នន័យ គ្រប់ស្ថាប័នពាក់ពន្ធ័ -បន្តការប្រមូលទិន្នន័យពាក់ព័ន្ធពីបណ្តាលមន្ទីរ/ស្ថាប័ន -បន្តដំណើរការរៀបចំរបាយការណ៍ពិនិត្យ និងបញ្ជូលទិន្នន័យ
-បន្តប្រជុំពិនិត្យ និងបូកសរុបទិន្នន័យផលិតផលសក្តានុពលក្នុងខេត្ត -បន្តជម្រុញការសុំចូលជាសមាជិក ភ១ផ១
-បន្តនាំយកផលិតផលសក្តានុពល ចូលរួមពិព័ណ៌ក្នុង និងក្រៅប្រទេស-បន្តផ្សព្វផ្សាយគោលនយោបាយថ្នាក់ជាតិស្តីពី ភ១ផ១ អោយបានទូលំទូលាយបន្តទៀត
-បន្តផ្សព្វផ្សាយ និងធ្វើបទសំភាសន៏ជាមួយវិទ្យុខេត្ត
-បន្តផ្សព្វផ្សាយតាមបណ្តាញព័ត៌មានសង្គម (Facebook)៕
ប្រភព៖ រដ្ឋបាលខេត្តក្រចេះ