ពិធីប្រារព្ធខួប លើកទី១០៧ ទិវាអន្តរជាតិនារី ៨មីនា ឆ្នាំ២០១៨ នៅក្នុងខេត្តស្វាយរៀង
March 07, 2018 អ្នកទស្សនា :

នាព្រឹកថ្ងៃពុធ ០៦រោច ខែផល្គុន ឆ្នាំរកា នព្វស័ក ព.ស ២៥៦១ ត្រូវនឹងថ្ងៃទី០៧ ខែមីនា ឆ្នាំ២០១៨នេះ ឯកឧត្ដម ម៉ែន វិបុល អភិបាល នៃគណៈអភិបាលខេត្តស្វាយរៀង និងលោកជំទាវ ឯកឧត្ដម ជុំ ហាត សមាជិកក្រុមប្រឹក្សាខេត្ត និងលោកជំទាវ តំណាងឯកឧត្ដមប្រធានក្រុមប្រឹក្សាខេត្ត បានចូលរួមជាមួយលោកជំទាវ ឈុន សារឹម អ្នកតំណាងរាស្រ្តមណ្ឌលខេត្តស្វាយរៀង និងលោកជំទាវ ពៅ សុភាព ទីប្រឹក្សាក្រសួងមហាផ្ទៃ អញ្ជើញជាអធិបតីក្នុងពិធីប្រារព្ធខួប លើកទី១០៧ ទិវាអន្តរជាតិនារី ៨មីនា ឆ្នាំ២០១៨ នៅសាលប្រជុំធំសាលាខេត្ត ដោយមានការអញ្ជើញចូលរួមពីថ្នាក់ដឹកនាំខេត្ត មន្ត្រីរាជការ និង កងកម្លាំងប្រដាប់អាវុធជាស្ត្រីក្នុងខេត្ត ប្រមាណ ៧០០នាក់ ។ មានប្រសាសន៍ក្នុងពិធីនោះ ឯកឧត្ដមអភិបាលខេត្ត បានបញ្ជាក់អំពីគោលបំណងនៃការរៀបចំទិវាដ៏មានអត្ថន័យនេះគឺដើម្បីរំលឹកនូវប្រវត្តិតស៊ូ និងការសាមគ្គីភាពរបស់ស្ដ្រី ដើម្បីទាមទារសិទ្ធិស្មើគ្នា និងឱកាសដូចគ្នាជាមួយនិងបុរស និងអបអរសាទរចំពោះសមិទ្ធផលនានាដែលស្ដ្រីសម្រេចបានទាំងក្នុងឋានៈ តួនាទី សិទ្ធិ និងសេរីភាព ក៏ដូចជាការចូលរួមយ៉ាងសកម្មក្នុងការងារអភិវឌ្ឍន៍សេដ្ឋកិច្ច សង្គម ហើយនៅឆ្នាំនេះ រាជរដ្ឋាភិបាលបានជ្រើសរើសយកប្រធានបទ “ស្ត្រីរួមគ្នារក្សាសន្តិភាពដើម្បីអភិវឌ្ឍន៍ជាតិ” ដើម្បីរំលេចឲ្យឃើញពីតម្លៃនៃសន្តិភាព និងការលើកកម្ពស់វប្បធម៌អហិង្សា ដែលរាជរដ្ឋាភិបាលបាននិងកំពុងគាំទ្រជំរុញឲ្យមានការចូលរួមពីគ្រប់ស្ថាប័នទាំងបុរស និងស្រ្តី ដើម្បីវឌ្ឍនភាព និងសុខុមាលភាពសង្គម ដោយធ្វើការទប់ស្កាត់ និងកាត់បន្ថយអំពើហិង្សាលើស្ត្រី ឆ្ពោះទៅលើកកម្ពស់សិទ្ធិ ស្ថានភាព ជីវភាព ឋានៈ និងតួនាទីរបស់ស្ត្រីក្នុងការកសាងសន្តិភាព និងវឌ្ឍនភាពសង្គម ។ ជាមួយគ្នានេះ ឯកឧត្ដមអភិបាលខេត្ត បានថ្លែងនូវការកោតសរសើរចំពោះសមត្ថភាពរបស់មន្រ្តីរាជការ និងកងកម្លាំងប្រដាប់អាវុធជាស្ត្រីទាំងអស់ក្នុងខេត្ត ដែលបានចូលរួមចំណែកនាំឲ្យខេត្តមានការអភិវឌ្ឍរីកចម្រើនឈានឡើងជាលំដាប់ ដែលអាចនិយាយបានថា “ស្ត្រីគឺជាឆ្អឹងខ្នងនៃការអភិវឌ្ឍសេដ្ឋកិច្ច និងសង្គម” ។ ក្នុងឱកាសនោះផងដែរ ឯកឧត្ដមអភិបាលខេត្ត ក៏បានលើកឡើងពីគិតគូរយកចិត្តទុកដាក់របស់រាជរដ្ឋាភិបាលចំពោះស្ត្រីតាមរយៈការដាក់ចេញនូវគោលនយោបាយ ច្បាប់ លិខិតបទដ្ឋានគតិយុត្ត ព្រមទាំងបង្កើតនូវយន្តការជាតិគាំទ្រជាបន្តបន្ទាប់ ដើម្បីលើកកម្ពស់សមភាពយេនឌ័រ ការពង្រឹងសិទ្ធិស្រ្តីក្នុងការទទួលបានការថែទាំសុខភាព ការអភិវឌ្ឍសមត្ថភាព ការបណ្ដុះបណ្ដាលវិជ្ជាជីវៈ ឱកាសការងារ ការផ្ដល់នូវអត្ថប្រយោជន៍ផ្សេងៗ ការការពារខាងផ្លូវច្បាប់ ធ្វើយ៉ាងណាឲ្យស្ត្រីចៀសផុតអំពីអំពើហិង្សាក្នុងគ្រួសារ និងការជួញដូរតាមគ្រប់រូបភាព ព្រមទាំងការបង្កើននូវតួនាទីរបស់ស្ត្រីក្នុងវិស័យសេដ្ឋកិច្ច និងការធ្វើសេចក្ដីសម្រេចចិត្តនានាទាំងនៅថ្នាក់ជាតិ និងថ្នាក់ក្រោមជាតិ ។ ទន្ទឹមនេះ ជាមួយនិងការអបអរសាទរទិវាអន្តរជាតិនារី ៨មីនា ឆ្នាំ២០១៨ ឯកឧត្ដមអភិបាលខេត្ត ក៏បានស្នើដល់គ្រប់អង្គភាពទាំងអស់ត្រូវផ្តល់ឱកាសដល់ស្ត្រីក្នុងការទទួលបានតួនាទីសមស្របទៅតាមសមត្ថភាព បទពិសោធន៍ និងតម្រូវការភារកិច្ចរបស់អង្គភាពនីមួយៗ និងបានអំពាវនាវដល់មន្ត្រីរាជការ និងកងកម្លាំងប្រដាប់អាវុធជាស្រ្តីទាំងអស់ ឲ្យបន្តចូលរួមចំណែកក្នុងការថែរក្សា ការពារសុខសន្តិភាព និងកសាងប្រទេសជាតិឲ្យកាន់តែមានការរីកចម្រើនថែមទៀត ជាពិសេស ត្រូវចូលរួមជួយអប់រំទូន្មានប្រៀនប្រដៅកូនចៅ សាច់ញាតិ ឲ្យក្លាយជាកូនល្អ សិស្សល្អ ពលរដ្ឋល្អ ចៀសឲ្យឆ្ងាយពីគ្រឿងញៀន អំពើហិង្សា និងគ្រឿងស្រវឹងគ្រប់ប្រភេទ និងត្រូវចូលរួមគោរពច្បាប់ចរាចរណ៍ឲ្យបានគ្រប់ៗគ្នា ។ ជាចុងបញ្ចប់ គណៈអធិបតីក៏បានផ្ដល់កិត្តិយសចែកជូកអ្នកចូលរួមទាំងអស់ ម្នាក់ៗទទួល បានសំពត់ ១ និងថវិកា ២ម៉ឺនរៀលផងដែរ ៕

ប្រភពព័ត៌មាន: រដ្ឋបាលខេត្តស្វាយរៀង (ថ្ងៃទី ០៧ ខែមីនា ឆ្នាំ២០១៨)

ព័ត៌មានទាក់ទង
ច្បាប់នឹងឯកសារថ្មីៗ
MINISTRY OF INTERIOR

ក្រសួងមហាផ្ទៃមានសមត្ថកិច្ច ដឹកនាំគ្រប់គ្រងរដ្ឋបាលដែនដី គ្រប់ថ្នាក់ លើវិស័យ រដ្ឋបាលដឹកនាំគ្រប់គ្រង នគរបាលជាតិ ការពារសន្តិសុខសណ្តាប់ធ្នាប់សាធារណៈ និងការពារសុវត្ថិភាព ជូនប្រជាពលរដ្ឋ ក្នុងព្រះរាជាណាចក្រកម្ពុជា។

ទាញយកកម្មវិធី ក្រសួងមហាផ្ទៃ​ទៅ​ក្នុង​ទូរស័ព្ទអ្នក
App Store  Play Store
023721905 023726052 023721190
#275 ផ្លូវព្រះនរោត្តម, ក្រុងភ្នំពេញ
ឆ្នាំ២០១៧ © រក្សាសិទ្ធិគ្រប់យ៉ាងដោយ ក្រសួងមហាផ្ទៃ