នាព្រឹកថ្ងៃអង្គារ ០៥រោច ខែផល្គុន ឆ្នាំរកា នព្វស័ក ព.ស ២៥៦១ ត្រូវនឹងថ្ងៃទី០៦ ខែមីនា ឆ្នាំ២០១៨នេះ ឯកឧត្ដម ម៉ែន វិបុល អភិបាល នៃគណៈអភិបាលខេត្តស្វាយរៀង បានអញ្ជើញដឹកនាំកិច្ចប្រជុំផ្សព្វផ្សាយសេចក្ដីសម្រេចស្ដីពីការកែសម្រួលក្រុមការងារត្រួតពិនិត្យលក្ខណៈបច្ចេកទេសយានយន្តខេត្ត នៅសាលប្រជុំសាលាខេត្ត ។ អញ្ជើញចូលរួមក្នុងកិច្ចប្រជុំនេះ រួមមាន លោកជំទាវអភិបាលរងខេត្ត លោកនាយករដ្ឋបាលសាលាខេត្ត លោកប្រធានមន្ទីរសាធារណការ និងដឹកជញ្ជូនខេត្ត លោកស្នងការរងនគរបាលខេត្ត លោកមេបញ្ជាការកងរាជអាវុធហត្ថខេត្ត លោកអភិបាលក្រុង ស្រុក និងលោក លោកស្រីជាសមាជិកក្រុមការងារត្រួតពិនិត្យលក្ខណៈបច្ចេកទេសយានយន្តខេត្ត ។ ក្នុងឱកាសនោះ ឯកឧត្ដមអភិបាលខេត្ត បានសម្ដែងនូវការកោតសសើរដល់មន្ត្រីជំនាញ និងសមត្ថកិច្ចពាក់ព័ន្ធទាំងអស់ដែលបានសហការអនុវត្តការងារត្រួតពិនិត្យលក្ខណៈបច្ចេកទេសយានយន្តនេះបានល្អប្រសើរស្របតាមតួនាទីភារកិច្ចដែលបានកំណត់ ព្រមទាំងបានផ្ដាំផ្ញើដល់សមត្ថកិច្ចជំនាញ ជាពិសេសអាជ្ញាធរក្រុង ស្រុក ត្រូវបង្កើនសកម្មភាពទ្វេឡើងថែមទៀត សំដៅធ្វើយ៉ាងណាទប់ស្កាត់កុំមានរថយន្តខុសលក្ខណៈបច្ចេកទេស ជាពិសេសរថយន្តតទ្រុង ចរាចរណ៍នៅលើដងផ្លូវក្នុងភូមិសាស្រ្តក្រុង ស្រុកនីមួយៗ ក្នុងករណីមានរថយន្តតទ្រុងខុសលក្ខណៈបច្ចេកទេសចរាចរណ៍នៅលើដងផ្លូវត្រូវចាត់វិធានការតាមផ្លូវច្បាប់ឲ្យបានម៉ឹងម៉ាត់បំផុត ៕

ប្រភពព័ត៌មាន: រដ្ឋបាលខេត្តស្វាយរៀង (ថ្ងៃទី ០៦ ខែមីនា ឆ្នាំ២០១៨)