នារសៀលថ្ងៃទី២៧ ខែកក្កដា ឆ្នាំ២០២០នេះ ឯកឧត្តម កៅ សុខអាន អភិបាលរងខេត្ត តំណាងឯកឧត្តម ឯកឧត្តម អ៊ុន ចាន់ដា អភិបាលនៃគណៈអភិបាលខេត្តកំពង់ចាម បានអញ្ជើញជាអធិបតីក្នុងពិធីប្រកាសចូលកាន់មុខតំណែងមន្ត្រីគ្រប់គ្រងការិយាល័យ នៃមន្ទីរអប់រំយុវជន និងកីឡា ខេត្តកំពង់ចាម និងពិធីប្រគល់ទងជ័យលាភី ប័ណ្ណសរសើរជូនអង្គភាពមានស្នាដៃការងារឆ្នេីម។
ឯកឧត្តម អភិបាលរងខេត្ត បានថ្លែងការកោតសរសើរ និងវាយតម្លៃខ្ពស់ចំពោះមន្ត្រីអប់រំគ្រប់លំដាប់ថ្នាក់ សាស្ត្រាចារ្យ លោកនាយក លោកស្រីនាយិកា លោកគ្រូ អ្នកគ្រូ និងអ្នកពាក់ព័ន្ធវិស័យអប់រំទាំងអស់ ដែលបានខិតខំបំពេញភារកិច្ចរៀងៗខ្លួនប្រកបដោយឆន្ទៈ មនសិការវិជ្ជាជីវៈ រួមទាំងការទទួលខុសត្រូវ ខ្ពស់ក្នុងការកសាងធនធានមនុស្ស និងការអភិវឌ្ឍវិស័យអប់រំប្រកបដោយភាពជោគជ័យ បេីទោះបីយេីងនៅមានចំណុចអវិជ្ជមាន ដែលត្រូវប្រឈម ក៏ដោយ តែយើងត្រូវជំនះបាននូវគ្រប់ឧបសគ្គទាំងនោះឆ្ពោះទៅមុខជានិច្ចនិរន្ត។
ឯកឧត្តម ក៏បានធ្វើការផ្តាំផ្ញើដល់មន្ត្រីគ្រប់គ្រងទេីបតែងតាំងថ្មី លោកគ្រូ អ្នកគ្រូ និងអ្នកពាក់ព័ន្ធជាមួយការងារអប់រំទាំងអស់ សូមធ្វើឲ្យបានទៅតាមការប្តេជ្ញាចិត្តរបស់ខ្លួន និងឲ្យមានភាពស្មោះត្រង់នឹងមុខវិជ្ជាជីវៈ ក្នុងការផ្តល់សេវាជូនមន្ត្រីរាជការ និងការផ្តល់សេវាជូនប្រជាពលរដ្ឋ ហើយញញឹមឲ្យបានច្រើនជាមួយប្រជាពលរដ្ឋ ព្រមទាំងមានភាពស្មោះត្រង់ជាមួយអង្គភាព អាជ្ញាធរដែនដី ក្រសួង រាជរដ្ឋាភិបាល ជាពិសេសត្រូវមានសាមគ្គីភាពល្អ កុំឧស្សាហ៍ចាប់តែកំហុសគេច្រើនពេក និងត្រូវចេះអប់រំគេឲ្យបានច្រើនផងដែរ។
គួរបញ្ចាក់ថា សម្រាប់ការងារប្រឡងប្រណាំងនៅឆ្នាំ២០១៩ កន្លងមកនេះ ខេត្តកំពង់ចាម ទទួលបានជ័យលាភី ពាន់រង្វាន់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា គួរជាទីមោទនៈ ក្នុងនោះ
-គ្រូល្អទទួលបានជ័យលាភីលេខ ១ ទូទាំងប្រទេស (មកពីបឋមសិក្សា កួច ម៉េងលី ទួលបេង ស្រុកកំពង់សៀម)
-គ្រូល្អទទួលបានជ័យលាភីលេខ ២ទូទាំងប្រទេស(មកពីបឋមសិក្សាវាលវង់ ក្រុងកំពង់ចាម)
-គ្រូល្អទទួលបានជ័យលាភីលេខ ៤ទូទាំងប្រទេស (មកពីបឋមសិក្សាវាលវង់ ក្រុងកំពង់ចាម)
-គ្រូល្អ ជាប់ចំណាត់ថ្នាក់ ប័ណ្ណសរសើរ (មកពីបឋមសិក្សា ស្វាយទាប ស្រុកចំការលើ ខេត្តកំពង់ចាម)
-នាយកល្អ ទទួលបានជ័យលាភីលេខ ៥ ទូទាំងប្រទេស (មកពីបឋមសិក្សា ថ្លុកជ្រៅ ស្រុកកងមាស)៕
ប្រភព៖ រដ្ឋបាលខេត្តកំពង់ចាម