នៅព្រឹកថ្ងៃទី២៥ ខែកក្តដា ឆ្នាំ២០២០ ឯកឧត្តម អ៊ុន ចាន់ដា អភិបាលនៃគណៈអភិបាលខេត្ត បានដឹកនាំមន្ត្រីពាក់ព័ន្ធ អាជ្ញាធរក្រុង និងគណៈអាជីវករផ្សារ អញ្ជើញចុះពិនិត្យស្ថានភាពលក់ដូររបស់បងប្អូនអាជីវករ នៅផ្សារបឹងកុក ស្ថិតនៅសង្កាត់កំពង់ចាម ក្រុងកំពង់ចាម និងផ្សារធំកំពង់ចាម ស្ថិតនៅសង្កាត់កំពង់ចាម ខេត្តកំពង់ចាម និងពិនិត្យស្ថានភាពជាក់ស្តែងនៃទីតាំងដែលត្រូវសាងសង់ដំបូលក្នុងផ្សារទាំងពីរ។

      ក្នុងឱកាសនៃការចុះពិនិត្យឯកឧត្តម អភិបាលខេត្ត បានឲ្យជំនាញចុះសាងសង់ដំបូលផ្នែកខាងមុខផ្សារបឹងកុក និងដំបូលផែ្នកខាងកើតនៃផ្សារធំកំពង់ចាម ឲ្យបានឆាប់រហ័ស និងសំណូមពរដល់បងប្អូនអាជីវករ និងប្រពលរដ្ឋទាំងអស់សូមឲ្យមានការយោគយល់ សហការជាមួយគណៈអាជីវករ ក្រុមជាងដែលទទួលការសាងសង់ដើម្បីឲ្យគម្រោងការសាងសង់សម្រេចបានលទ្ធផលតាមការគ្រោងទុក ជាមួយគ្នានេះ ទាំងបងប្អូនអាជីវករ និងប្រជាពលរដ្ឋដែលមកទិញទំនិញនៅផ្សារទាំងពីរ បានសម្តែងនូវការសាទរចំពោះឯកឧត្តមអភិបាលខេត្តដែលបានគិតគូរពីសុខទុក្ខ និងការលំបាករបស់បងប្អូនអាជីវករទាំងពីរផ្សារ និងសូមគោរពថ្លែងអំណរគុណដល់ឯកឧត្តមអភិបាលខេត្តដែលបានផ្តួចផ្តើមការសាងសង់ដំបូលផ្សារទាំងពីរនេះ។

      សូមបញ្ចាក់ថា ដោយមើលឃើញពីការលំបាក របស់បងប្អូនអាជីវករទាំងពីរផ្សារ ដោយនៅរដូវវស្សាទឹកលិច ហើយរដូវប្រាំងក្តៅខ្លាំង គ្មានខ្យល់ចេញចូលគ្រប់គ្រាន់ ឯកឧត្តមអភិបាលខេត្តបានអនុញ្ញាតឲ្យមន្ត្រីជំនាញសិក្សា និងរៀបចំការសាងសង់ដំបូលផ្សារទាំងពីរមាន ទំហំ ១០.៣៨០ម៉ែត្រការ៉េ (ក្នុងនោះផ្សារបឹងកុក ទំហំ ៤.០០០ម៉ែត្រការ៉េ និងផ្សាធំកំពង់ចាម ទំហំ៦.៣៨០ម៉ែត្រការ៉េ) ដើម្បីកែលំអរបរិយាកាសនៃការលក់ដូរ ដោយផ្តល់នូវផាសុខភាព ទាំងអាជីវករ និងបងប្អូនប្រជាពលរដ្ឋឲ្យមានខ្យល់អាកាសគ្រប់គ្រាន់។ គម្រោងទាំងពីរខាងលើនេះប្រើប្រាស់ថវិការបស់រដ្ឋបាលខេត្តកំពង់ចាម៕

ប្រភព៖ រដ្ឋបាលខេត្តកំពង់ចាម