ខេត្តកែប៖ កាលពីរសៀលថ្ងៃសុក្រ ទី០៣ ខែកក្កដា ឆ្នាំ២០២០ គណៈបញ្ជាការឯកភាពខេត្តកែប បានបេីកកិច្ចប្រជុំ ព្រមជាមួយសមាសភាពពាក់ព័ន្ធបន្ថែមមួយចំនួនទៀត ក្រោមអធិបតីភាព ឯកឧត្ដម សោម ពិសិដ្ឋ អភិបាលនៃគណៈអភិបាលខេត្តកែប និងជាប្រធានគណៈបញ្ជាការឯកភាពខេត្ត។
កិច្ចប្រជុំដ៏មានសារៈសំខាន់នេះ ឯកឧត្ដម បានផ្សព្វផ្សាយនូវបទបញ្ជារបស់សម្តេចតេជោនាយករដ្ឋមន្រ្តី អំពីការកាត់ឆ្វៀលដីជូនពលរដ្ឋរស់នៅក្នុងតំបន់អភិរក្ស តំបន់សត្វព្រៃ និងតំបន់ការពារផ្សេងៗរបស់រដ្ឋដែលសម្តេចតេជោបានដាក់ចេញក្នុងសម័យប្រជុំគណៈរដ្ឋមន្រ្តីពេញអង្គ នៅថ្ងៃទី៣ កក្កដា ២០២០។
ឯកឧត្ដម បានណែនាំដល់មន្ទីរ អង្គភាពដែលពាក់ព័ន្ធជាពិសេសគឺ មន្ទីរបរិស្ថានខេត្ត មន្ទីរកសិកម្ម រុក្ខាប្រមាញ់ និងនេសាទខេត្ត និងមន្ទីររៀបចំដែនដី នគរូបនីយកម្ម សំណង់ និងសុរិយោដីខេត្ត គឺត្រូវត្រៀមសហការអោយបានល្អជាមួយក្រសួងក្នុងការតែកាត់ឆ្វៀលដីជូនបងប្អូនប្រជាពលរដ្ឋដែលបានមករស់នៅលើទីតាំងដីដែលជាគម្របព្រៃឈើ ឬជាតំបន់ការពារ ឬតំបន់អភិរក្សសត្វព្រៃរបស់រដ្ឋ ដែលមានពលរដ្ឋបានមកធ្វើផ្ទះរស់នៅជាងដប់ម្ភៃឆ្នាំមកហើយ។
ឯកឧត្ដមក៏បានណែនាំបន្ថែមដល់មន្ទីរពាក់ព័ន្ធ រដ្ឋបាលក្រុង ស្រុក ត្រូវពិនិត្យ សិក្សា និងធ្វេីស្ថិតិអោយបានច្បាស់លាស់ប្រកបដោយតម្លាភាព និងសមធម៌នូវប្រជាពលរដ្ឋដែលបានតាំងទីលំនៅលេីដីរដ្ឋកន្លងមក បង្កើតកូនចៅរាប់សិបឆ្នាំមកហើយនៅលើទីតាំងដីទាំងនោះ ដេីម្បីចេញប្លង់អោយពួកគាត់បានរស់នៅកាន់ស្របច្បាប់ ជៀសវាងប្រជាពលរដ្ឋមានការភ័យខ្លាច អត់ឃ្លាន រត់ទៅចំណាកស្រុកតទៅទៀត។
ក្រៅពីនេះ ឯកឧត្ដម សោម ពិសិដ្ឋ អភិបាលនៃគណៈអភិបាលខេត្តកែប ក៏បាដាក់ចេញទិសដៅការងារមួយចំនួនបន្ថែមទៀតសម្រាប់អនុវត្ត ជាពិសេសការការពារសន្តិសុខសណ្តាប់ប្រជាពលរដ្ឋ ភ្ញៀវទេសចរជាតិ អន្តរជាតិដែលមកទស្សនា សម្រាកលម្ហែក្នុងខេត្ត និងការអភិវឌ្ឍខេត្តជាបន្តបន្ទាប់៕
ប្រភព៖ រដ្ឋបាលខេត្តកែប
