ថ្នាក់ដឹកនាំខេត្ត មន្ត្រីរាជការជុំវិញខេត្តបានអញ្ជើញចូលរួមក្នុងពិធី ក្រុងពលី បញ្ចុះបឋមសិលាសាងសង់សំណង់ច្រាំងស្ទឹងសង្កែត្រើយខាងលិច នៅមុខមន្ទីរពេទ្យបង្អែកខេត្តបាត់ដំបង ។ ព្រឹកថ្ងៃអង្គារ ០៦កើត ខែផល្គុន ឆ្នាមរកា នព្វស័ក ព.ស២៥៦១ ត្រូវនឹង ថ្ងៃទី២០ ខែកុម្ភៈ ឆ្នាំ២០១៨ ឯកឧត្តម អ៊ុយ រី ប្រធានក្រុមប្រឹក្សាខេត្ត ឯកឧត្តម ងួន រតនៈ អភិបាល នៃគណៈអភិបាលខេត្តបាត់ដំបង ព្រមទាំង ឯកឧត្តម លោកជំទាវ សមាជិកក្រុមប្រឹក្សាខេត្ត អភិបាលរងខេត្ត អភិបាលក្រុង មន្ទីរអង្គភាពជិំវិញខេត្ត មន្រ្តីរាជការ បងប្អូនប្រជាពលរដ្ឋ បានអញ្ជើញចូលរួមក្នុងពិធី ក្រុងពលី បញ្ចុះបឋមសិលាសាងសង់សំណង់ច្រាំងស្ទឹងសង្កែត្រើយខាងលិច នៅមុខមន្ទីរពេទ្យបង្អែកខេត្តបាត់ដំបង ។ ច្រាំងស្ទឹងសង្កែទល់មុខមន្ទីរពេទ្យបង្អែកខេត្តបាត់ដំបង មានមាត់លើប្រវែង ១៨០ម៉ែត្រនិងជើងក្រោមប្រវែង១៣២ម៉ែត្រ ដែលរងការបាក់ដោយទឹកជំនន់ជាបន្តបន្ទាប់នោះ ។

ឯកឧត្តម អភិបាល នៃគណៈអភិបាលខេត្តបានមានប្រសាសន៍ថា ការកសាងច្រាំងស្ទឹងនេះជាថវិការបស់រដ្ឋបាលខេត្ត ដែល មានគុណប្រយោជន៍ដើម្បីការពារផ្លូវជាប់មាត់ស្ទឹងកុំឱ្យបាក់ផង និងកែលម្អសោភ័ណភាពមាត់ស្ទឹងផងដែលរងការខូចខាតពីទឹកជំនន់ជាច្រើនឆ្នាំមកហើយ ។ ចំពោះច្រាំងស្ទឹងសង្កែនៅកន្លែងដ៏ទៃទៀតដែលរងការបាក់ដោយទឹកជំនន់ដែរនោះ ឯកឧត្តមអភិបាលខេត្តបានឱ្យដឹងថា៖ គឺយើងមានដៃគូអភិវឌ្ឍន៍បានកំពុងសិក្សាហើយដែរ ក្នុងទិសដៅរួមគ្នាការពារប្រព័ន្ធគមនាគមន៍ដែលមានប្របមាត់ស្ទឹងកុំឱ្យបាក់ថែមទៀត ។

ប្រភពព័ត៌មាន: រដ្ឋបាលខេត្តបាត់ដំបង (ថ្ងៃទី២០ ខែកុម្ភៈ ឆ្នាំ២០១៨)