កំពង់ឆ្នាំង៖ នារសៀលថ្ងៃព្រហស្បតិ៍ ទី០៤ ខែមិថុនា ឆ្នាំ២០២០នេះ លោកគ្រូអ្នកគ្រូ៣រូប បានទទួលជ័យលាភីពានរង្វាន់សម្ដេច ហ៊ុន សែន និងលោកគ្រូ៧រូប ទទួលបានប័ណ្ណសរសើរពីថ្នាក់ដឹកនាំក្រសួងអប់រំ យុវជន និងកីឡា ដើម្បីជាការលើកទឹកចិត្តដែលបានខិតខំប្រឹងប្រែងក្នុងការបំពេញភារកិច្ចការងារយ៉ាងអស់ពីកម្លាំងកាយចិត្ត ដែលការខិតខំប្រឹងប្រែងទាំងនោះចូលរួមចំណែកក្នុងការលើកកម្ពស់គុណភាពអប់រំនៅកម្ពុជា។
ពិធីប្រគល់ពានរង្វាន់នេះ បានប្រព្រឹត្តទៅក្រោមអធិបតីភាពឯកឧត្ដមបណ្ឌិតសភាចារ្យ ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា ដោយមានការចូលរួមពីឯកឧត្តម ស្រ៊ន សំឫទ្ធី អភិបាលរងខេត្តកំពង់ឆ្នាំង លោក សឹម ប្រឹម ប្រធានមន្ទីរអប់រំ យុវជន និងកីឡាខេត្ត រៀបចំនៅមន្ទីរអប់រំ យុវជន និងកីឡាខេត្តកំពង់ឆ្នាំង។
សូមជម្រាបជូបផងដែរថាៈ សម្រាប់ខេត្តកំពង់ឆ្នាំង ជ័យលាភីទាំង៣រូបទទួលពានរង្វាន់សម្តេចតេជោហ៊ុនសែន រួមមាន ពានរង្វាន់គ្រូបង្រៀនល្អ ភាសាខ្មែរថ្នាក់ទី១-៣ ចំណាត់ថ្នាក់លេខ៣ គ្រូបង្រៀនល្អគណិតវិទ្យា ថ្នាក់ទី១-៣ ចំណាត់ថ្នាក់លេខ២ និងពានរង្វាន់សាលារៀនស្អាត ចំណាត់ថ្នាក់លេខ៤៕
ប្រភព៖ រដ្ឋបាលខេត្តកំពង់ឆ្នាំង
