រាជធានីភ្នំពេញ ថ្ងៃទី៩ ខែកុម្ភះ ឆ្នាំ២០១៨ ថ្នាក់ដឹកនាំនៃក្រសួងអប់រំ យុវជន និងកីឡា និងអគ្គលេខាធិការដ្ឋានអាជ្ញាធរជាតិប្រយុទ្ធប្រឆាំងគ្រឿងញៀនជាក្រុមការងារផ្សព្វផ្សាយពីបញ្ហាគ្រឿងញៀនក្នុងវិស័យអប់រំ បានជួបប្រជុំពិភាក្សាការងាររៀបផែនការផ្សព្វផ្សាយសម្រាប់ឆ្នាំ២០១៨ ។ លោកជំទាវសឿ សុជាតា អនុរដ្ឋលេខាធិការក្រសួងអប់រំ យុវជន និងកីឡា បានមានប្រសាសន៍ថា ការងារផ្សព្វផ្សាយពីបញ្ហាគ្រឿងញៀនដែលត្រូវអនុវត្តបន្តនោះគឺយើងត្រូវធ្វើទៅលើក្រុមគោលដៅជាគ្រូបង្រៀនកុមារ សិស្សមធ្យមសិក្សា និងឧត្តមសិក្សា យុវជន សិស្សបោះបង់សាលា ដោយគ្រោងផលិតជាចម្រៀង សៀវភៅរឿងខ្លី ប្រលងប្រណាំងគំនូរ កំណាព្យសម្រាប់កុមារ និងយុវជន ។ ឯកឧត្តម ឧត្តមសេនីយ៍ឯក ថោង សុគន្ធា អគ្គលេខាធិការរង នៃអាជ្ញាធរជាតិប្រយុទ្ធប្រឆាំងគ្រឿងញៀនបានថ្លែងសាទរពីគំនិតផ្តួចផ្តើមដែលបានលើកឡើងដោយតំណាងក្រសួងអប់រំ យុវជន និងកីឡា ដោយឯកឧត្តម បញ្ជាក់ថាចំគោលដៅ និងចំពេលវេលា សម្រាប់បង្ការទប់ស្កាត់កុមារ និងយុវជនកុំឲ្យពាក់ព័ន្ធបញ្ហាគ្រឿងញៀន។
ប្រភពព័ត៌មាន: អាជ្ញាធរជាតិប្រយុទ្ធប្រឆាំងគ្រឿងញៀន
