នារសៀលថ្ងៃអង្គារ ៥រោច ខែមាឃ ឆ្នាំរកា នព្វស័ក ព.ស ២៥៦១ ត្រូវនឹងថ្ងៃទី០៥ ខែកុម្ភះ ឆ្នាំ២០១៨ រដ្ឋបាលខេត្តកណ្តាល បានរៀបចំពិធីបើកសន្និបាតបូកសរុបលទ្ធផលការងារប្រចាំឆ្នាំ២០១៧ និងលើកទិសដៅការងារ សម្រាប់អនុវត្តឆ្នាំ២០១៨ របស់រដ្ឋបាលខេត្ត ក្រោមអធិបតីភាពឯកឧត្តម នួន ផា ប្រធានក្រុមប្រឹក្សាខេត្ត និងឯកឧត្តម ម៉ៅ ភិរុណ អភិបាលនៃគណ:អភិបាលខេត្ត។ សមាសភាពអញ្ជើញចូលរួម មាន៖ សមាជិកក្រុមប្រឹក្សាខេត្ត, អភិបាលរងខេត្ត, ប្រធាន អនុប្រធានមន្ទីរអង្គភាពជុំវិញខេត្ត,កងកម្លាំងទាំងបីខេត្ត ក្រុង ស្រុក, ប្រធានក្រុមប្រឹក្សា អភិបាល អភិបាលរងក្រុង ស្រុក, មេឃុំ ចៅសង្កាត់, ស្មៀនឃុំសង្កាត់, នាយប៉ុស្ត៍នគរបាលឃុំសង្កាត់, តំណាងអង្គការ UNICEF , អង្កការ GIZ-DAR អង្គរសង្គមស៊ីវិល ស្ថាប័នមីក្រូហិរញ្ញវត្ថុ និងមន្រ្តីរាជការសរុប ចំនួន ៦៧១ នាក់។ គោលបំណងសំខាន់នៃអង្គសន្និបាត ៖
+ផ្សព្វផ្សាយពី របាយការណ៍លទ្ធផលការងារសម្រេចបាននាឆ្នាំ២០១៧ និង ទិសដៅការងារសំខាន់ៗសម្រាប់ឆ្នាំ២០១៨ របស់រដ្ឋបាលខេត្តកណ្តាល
+វែងយល់ពីចំណុច វិជ្ជមាន អវិជ្ជមាន និងអនុសាសន៍លើកិច្ចការផ្តល់សេវាសាធារណៈ និង កិច្ចអភិវឌ្ឍន៍មូលដ្ឋាន របស់រដ្ឋបាលខេត្តកណ្តាល
+ផ្លាស់ប្តូរមេរៀនបទពិសោធន៍ និង រៀនសូត្រពីគ្នាទៅវិញទៅមក +ប្រមូលធាតុចូលសម្រាប់រៀបចំបទអន្តរាគមន៍របស់រដ្ឋបាលខេត្ត ក្នុងអង្គសន្និបាតប្រចាំឆ្នាំរបស់ក្រសួងមហាផ្ទៃ។
*សូមបញ្ជាក់ថា សន្និបាតរបស់រដ្ឋបាលខេត្តកណ្តាល ត្រូវបានបើកនៅរសៀលថ្ងៃទី០៥ ខែកុម្ភៈ ហើយគ្រោងនឹងរៀបចំពិធីបិទនៅព្រឹកថ្ងៃទី០៧ ខែកុម្ភៈ ឆ្នាំ២០១៨ ក្រោមអធិបតីភាពដ៏ខ្ពង់ខ្ពស់ សម្តេចក្រឡាហោម ស ខេង ឧបនាយក រដ្ឋមន្ត្រី រដ្ឋមន្ត្រីក្រសួងមហាផ្ទៃ។ ប្រភពព័ត៌មាន: រដ្ឋបាលខេត្តកណ្តាល (ថ្ងៃទី ០៥ ខែកុម្ភៈ ឆ្នាំ២០១៨)
