ព្រឹកថ្ងៃចន្ទ ទី៦ ខែមេសា ឆ្នាំ២០២០ លោក គង់ វិតាណ: អភិបាលរងខេត្ត តំណាងឯកឧត្តម គួច ចំរើន អភិបាលនៃគណៈអភិបាលខេត្តព្រះសីហនុ បានដឹកនាំមន្ត្រីពាក់ព័ន្ធអញ្ជើញចុះពិនិត្យស្ថានភាព និងសួរសុខទុក្ខប្រជាពលរដ្ឋ ដែលបានត្រឡប់មកពីបរទេស ហើយត្រូវបានដាក់ឲ្យនៅដាច់ដោយឡែករយ:ពេល១៤ថ្ងៃ ចំនួន៣៦នាក់ ស្ថិតនៅក្នុងឃុំចំនួន៥ មានដូចជា ឃុំរាម ឃុំអូរឧកញ៉ាហេង ឃុំបឹងតាព្រហ្ម ឃុំអូរជ្រៅ និងឃុំព្រៃនប់ ស្រុកព្រៃនប់ ខេត្តព្រះសីហនុ។
ជាមួយគ្នានេះ លោក គង់ វិតាណ: ក៏បានអំពាវនាវដល់បងប្អូនប្រជាពលរដ្ឋ សូមអនុវត្តន៍តាមការណែនាំរបស់ក្រសួងសុខាភិបាលអោយបានត្រឹមត្រូវ ដើម្បីចូលរួមទប់ស្កាត់ការរីករាលដាលនៃជំងឺឆ្លងកូវីដ១៩ ដែលមិនទាន់មានសញ្ញាថមថយនៅឡើយ។ ដើម្បីសុវត្ថិភាពសុខភាពផ្ទាល់ខ្លួន និងសម្រាប់គ្រួសារ សូមបងប្អូនដាក់ខ្លួនឱ្យនៅដាច់ដោយឡែករយៈពេល១៤ថ្ងៃ ក្នុងករណីមានការសង្ស័យ ត្រូវរាយការណ៍ជាបន្ទាន់មកអាជ្ញាធរមូលដ្ឋានមានមេភូមិមេឃុំ និងមូលដ្ឋានសុខាភិបាលដែលនៅជិតបំផុត ដើម្បីផ្តល់កិច្ចអន្តរាគមន៍បានទាន់ពេលវេលា។
ក្នុងឱកាសនៃការចុះពិនិត្យស្ថានភាព និងសួរសុខទុក្ខនេះផងដែរ លោក គង់ វិតាណ: ក៏បាននាំយកអំណោយរបស់រដ្ឋបាលខេត្ត ដែលជាការឧបត្តម្ភពីសប្បុរសជន ផ្តល់ជូនបងប្អូនប្រជាពលរដ្ឋទាំង៣៦នាក់ ដោយម្នាក់ៗទទួលបាន អង្ករ១បាវ ត្រីខ១យួរ ទឹកសុទ្ធ១កេស ម៉ាស១ប្រអប់ និងថវិកា៥០.០០០រៀល៕
ប្រភព៖ រដ្ឋបាលខេត្តព្រះសីហនុ