រសៀលថ្ងៃអាទិត្យ ទី០៥ ខែមេសា ឆ្នាំ២០២០ លោក គង់ វិតាណ: អភិបាលរងខេត្ត តំណាងឯកឧត្តម គួច ចំរើន អភិបាលនៃគណៈអភិបាលខេត្តព្រះសីហនុ បានអញ្ជើញចុះសួរសុខទុក្ខប្រជាពលរដ្ឋចំណាកស្រុក និងចំណូលថ្មី ចំនួន១០នាក់ ដែលក្នុងនោះគ្រួសារចំណូលថ្មីដែលបានដាក់ឲ្យនៅដាច់ដោយឡែករយ:ពេល១៤ថ្ងៃ ចំនួន៣នាក់ ស្រី២ ត្រូវបានដាក់ឲ្យនៅធម្មតាវិញ និងផ្តល់ជូននូវអង្ករ១បាវ ស្មើនឹង៥០គីឡូ ត្រីខ៣យួរ ទឹកសុទ្ធ៣យួរ ថវិកាក្នុងម្នាក់ៗ៥០.០០០រៀល រីឯប្រជាពលរដ្ឋចំណាកស្រុក១នាក់ ស្ថិតក្នុងការតាមដានរយ:ពេល១៤ថ្ងៃ ត្រូវបានផ្តល់ជូននូវអង្ករចំនួន២៥គីឡូ ទឹកសុទ្ធ២យួរ ត្រីខ២យួរ និងថវិកា៥០.០០០រៀល។

    ដោយឡែកប្រជាពលរដ្ឋចំណូលថ្មីមួយគ្រួសារចំនួន៦នាក់ ស្រី៤នាក់ដែលទើបមកដល់មូលដ្ឋានកាលពីថ្ងៃទី៣ ខែមេសា ឆ្នាំ២០២០ ត្រូវបានអាជ្ញាធរមូលដ្ឋាននិងចត្តាឡីស័ក បានចុះធ្វើការណែនាំឲ្យរស់នៅដាច់ដោយឡែករយ:ពេល១៤ថ្ងៃ និងបានផ្តល់ជូននូវអង្ករ១បាវ ស្មើនិង៥០គីឡូ ទឹកសុទ្ធ២យួរ ត្រីខ៣យួរ និងថវិកា២០០.០០០រៀលផងដែរ៕

ប្រភព៖ រដ្ឋបាលខេត្តព្រះសីហនុ