នៅព្រឹកថ្ងៃទី០២ ខែមេសា ឆ្នាំ២០២០នេះ ឯកឧត្តម អ៊ុន ចាន់ដា អភិបាលនៃគណៈអភិបាលខេត្តកំពង់ចាម និងលោកជំទាវ អភិបាលរងខេត្ត បានអញ្ជើញចុះសួរសុខទុក្ខបងប្អូនប្រជាពលរដ្ឋ និងពលករ ពលការីនីដែលទើបនឹងត្រឡប់មកពីបរទេស នៅសង្កាត់ទាំង៤ ក្នុងក្រុងកំពង់ចាម ចំនួន៥៦៦គ្រួសារ។ ឯកឧត្តម បានផ្តល់ជាអំណោយក្នុង០១គ្រួសារៗទទួលបាននូវ អង្ករ២៥គីឡូក្រាម ត្រីខ១យួរ សាប៊ូ០១ដុំ និងក្រមារចំនួន០១។
ក្នុងឱកាសចុះតាមខ្នងផ្ទះ នៅសង្កាត់ទាំង៤ ក្នុងក្រុងកំពង់ចាម ឯកឧត្តមអភិបាលខេត្ត និងជាប្រធានក្រុមការងារ បានផ្តាំផ្ញើនូវការសាកសួរសុខទុក្ខពីប្រមុខរាជរដ្ឋាភិបាល និងបានណែនាំដល់អាជ្ញាធរគ្រប់លំដាប់ថ្នាក់ និងអ្នកពាក់ព័ន្ធនានា ត្រូវបន្តចុះផ្សព្សផ្សាយនូវវិធានការអប់រំ បង្ការការរីករាលដាលនៃជម្ងឺកូវីដ១៩ និងណែនាំឲ្យបងប្អូនយកចិត្តទុកដាក់ខ្ពស់លើបញ្ហាសុខភាព ប្រសិនបើមានបងប្អូនប្រជាពលរដ្ឋមានបញ្ហាសុខភាព ត្រូវរាយការណ៍ជូនអាជ្ញាធរដែលនៅជិត និងត្រូវចាត់បញ្ជូនពួកគាត់ទៅកាន់មណ្ឌលសុខភាព ឬមន្ទីរពេទ្យដែលនៅជិតបំផុត៕
ប្រភព៖ រដ្ឋបាលខេត្តកំពង់ចាម