ក្រោយពីចូលរួមក្នុងពិធីមាឃបូជានាព្រឹកថ្ងៃពុធ ១៥កើត ខែមាឃ ព.ស២៥៦១ ត្រូវនឹងថ្ងៃទី៣១ ខែមករា ឆ្នាំ២០១៨ វត្តទួលសំបូរ ស្ថិតក្នុងឃុំអង្គរបូរី ស្រុកអង្គបូរី រួចមក ឯកឧត្តម ឡាយ វណ្ណៈ អភិបាលខេត្តតាកែវ បានអញ្ជើញចុះសួរសុខទុក្ខបងប្អូនកម្មកររោងចក្រសេណូដូ ដែលបានដួលសន្លប់កាលពីថ្ងៃទី៣០ ខែមករា ឆ្នាំ២០១៨ ហើយត្រូវបានបញ្ជូនទៅសម្រាកព្យាបាលនៅមន្ទីរពេទ្យបង្អែកស្រុកបាទី។ ឯកឧត្តមអភិបាលខេត្តក៏បានណែនាំបងប្អូនត្រូវសម្រាកព្យាបាលឱ្យបានជាសះស្បើយ និងមានកម្លាំងពេញលេញឡើងវិញចាំត្រឡប់ទៅធ្វើការ។ បន្ថែមពីនោះឯកឧត្តមក៏បានផ្តាំផ្ញើដល់ក្រុមគ្រូពេទ្យត្រូវយកចិត្តទុកដាក់ចំពោះសុខភាពបងប្អូនកម្មករដែលកំពុងសម្រាកព្យាបាលជំងឺនេះឱ្យបានល្អបំផុត។ សូមបញ្ជាក់ថាក្រោយពីទទួលដំណឹងថាកម្មកររោងចក្រសេណូដូដួលសន្លប់ភ្លាម ឯកឧត្តមអភិបាលខេត្តបានចាត់សាខាកាកបាទក្រហមខេត្តចុះទៅពិនិត្យ និងចែកអំណោយភ្លាមៗដល់មន្ទីរពេទ្យបង្អែកស្រុកបាទី។ កម្មករដែលដួលសន្លប់ទាំងអស់ចំនួន៨៩នាក់ ក្នុងនោះបានធូរស្រាលនិងត្រឡប់ទៅផ្ទះវិញចំនួន ៦៧នាក់ និងនៅសម្រាកព្យាបាលនៅមន្ទីរពេទ្យចំនួន ២២នាក់គិតមកត្រឹមរសៀលថ្ងៃទី៣១ ខែមករា ឆ្នាំ២០១៨នេះ។
ប្រភពព័ត៌មាន: រដ្ឋបាលខេត្តតាកែវ (ថ្ងៃទី៣១ ខែមករា ឆ្នាំ២០១៨)