នៅព្រឹកថ្ងៃអង្គារ ទី២៤ ខែមីនា ឆ្នាំ២០២០នេះ Dr. Etienne Poirlot ប្រធានផ្នែកសុខសភាព និងបង្ការជំងឺឆ្លងរបស់អង្គការយូនីសេហ្វ ប្រចាំនៅកម្ពុជា ព្រមទាំងសហការី បានទទួលជួបសម្តែងការគួរសម និងពិភាក្សាការងារជាមួយឯកឧត្តម ម៉ុម សារឿន អភិបាលនៃគណៈអភិបាលខេត្តស្ទឹងត្រែង ដែលធ្វើឡើងនៅសាលាខេត្តស្ទឹងត្រែង(សាលសវនកា)។
ក្នុងជំនួបនោះដែរឯកឧត្តម ម៉ុម សារឿន បានមានមតិស្វាគមន៍ និងថ្លែងអំណរគុណ ព្រមទាំងគូសបញ្ជាក់អំពីទំនាក់ទំនងសហប្រតិបត្តិការរវាងអង្គការយូនីសេហ្វ ជាមួយរដ្ឋបាលខេត្តស្ទឹងត្រែង និងជម្រាបជូនអំពីស្ថានភាព ព្រមទាំងវិធានការរបស់គណៈកម្មការប្រយុទ្ធនឹងជំងឺកូវីដ១៩(COVID-19)ខេត្ត។
ឆ្លៀតក្នុងឱកាសនោះឯកឧត្ដម អភិបាលខេត្ត បានជំរុញឲ្យអង្គការយូនីសេហ្វ បន្តនូវសកម្មភាពការងាររបស់ខ្លួន ពិសេសជួយគាំទ្រ ទាំងធនធាន សម្ភារ ការអប់រំសុខភាព អនាម័យ និងវិធានការការពារជំងឺកូវីដ១៩ នៅតាមបណ្តាមូលដ្ឋាននានា ក្នុងភូមិសាស្ត្រក្នុងខេត្តស្ទឹងត្រែង។
ក្នុងឱកាសនោះដែរក្រុមការងាររបស់អង្គការយូនីហេស្វ បានធ្វើការកោតសរសើរ និងវាយតម្លៃចំពោះកិច្ចខិតខំប្រឹងប្រែងរបស់អាជ្ញាធរខេត្តគ្រប់ដំដាប់ថ្នាក់ក្នុងការអនុវត្តផែនការត្រៀមបង្ការទប់ស្កាត់ និងឆ្លើយតបការរីករាលដាល់នៃជំងឺកូវីដ១៩(COVID-19)៕
ប្រភព៖ រដ្ឋបាលខេត្តស្ទឹងត្រែង