នាព្រឹកថ្ងៃចន្ទ ទី២៣ ខែមីនា ឆ្នាំ២០២០ ឯកឧត្តម ឯកឧត្ដម ប៉ែន កុសល្យ អភិបាល នៃគណៈអភិបាលខេត្តឧត្ដរមានជ័យ និងជាប្រធានគណៈកម្មការដើម្បីប្រយុទ្ធប្រឆាំងនឹងជំងឺកូវីដ-១៩ ដឹកនាំកិច្ចប្រជុំបន្ទាន់សម្រាប់បង្ការ និងត្រៀមទុកជាមុន ដើម្បីទុបស្កាត់ការរីករាលដាលនៃជំងឺCOVID-19 ដោយមានការអញ្ជើញចូលពីឯកឧត្តម លោកជំទាវ អភិបាលរងខេត្ត កងកម្លាំងប្រដាប់អាវុធទាំងបីប្រភេទ មន្ទីរ-អង្គភាព។ បន្ទាប់ពីបើកកិច្ចប្រជុំចប់ ឯកឧត្ដម បានដឹកនាំ ក្រុមការងារចុះពិនិត្យ និងកំណត់យកទីតាំងសាលារៀន "វិទ្យាល័យតេជោ សែន សំរោង" ដើម្បីរៀបចំ និងត្រៀមបង្ការទុកជាមុន ដើម្បីប្រយុទ្ធប្រឆាំងពីការរាតត្បាត ឆ្លងជម្ងឺកូវីដ-១៩។
ឯកឧត្តមអភិបាលខេត្ត បានឲ្យដឹងថា៖ការចុះត្រួតពិនិត្យនិងត្រៀមបំរុងទុកទីតាំងដោយកំណត់យកទីតាំងវិទ្យាល័យតេជោសែន សំរោងនេះ គឺក្នុងគោលបំណង ត្រៀមទុកជាមុនក្នុងករណីចាំបាច់ ដើម្បីបង្ការទប់ស្កាត់ការរាតត្បាតពីជម្ងឺផ្លូវដង្ហើម(កូវីដ-១៩)។
ជាជំហានដំបូងក្នុងការត្រៀមបំរុងនេះ រដ្ឋបាលខេត្ត បានកំណត់យកអគារដែលមានកំពស់៣ជាន់ នៃវិទ្យាល័យតេជោសែន សំរោង ដោយរៀបចំនួន ៧បន្ទប់ នៅជាន់ផ្ទាល់ដី ដើម្បីត្រៀមបំរុងទុកចំពោះបងប្អូនដែលសង្ស័យថាមានពាក់ព័ន្ធជម្ងឺឆ្លងកូវីដ-19 ដោយនៅទីនោះ មានការថែទាំ និងការផ្តល់សេវាពិគ្រោះ និងត្រួតពិនិត្យយ៉ាងម៉ត់ចត់ពីក្រុមគ្រូពេទ្យជំនាញប្រចាំការនៅទីនេះ៕
ប្រភព៖ រដ្ឋបាលខេត្តឧត្តរមានជ័យ