កំពង់ចាម៖ នៅស្នងការដ្ឋាននគរបាលខេត្តកំពង់ចាម នាព្រឹកថ្ងៃទី៩ ខែមិនា ឆ្នាំ២០២០នេះ បានប្រារព្ធពិធីអបអរសាទរទិវានារីអន្តរជាតិ ៨ មីនា ខួបលើកទី១០៩ ឆ្នាំ២០២០ ក្រោមប្រធានបទ«មានសន្តិភាព មានការលេីកកម្ពស់សមភាពយេនឌ័រ» ដែលពិធីនេះត្រូវបានធ្វេីឡេីង ក្រោក្រោមវត្តមាន លោកំទាវ ញូង ចរិយា អ៊ុន ចាន់ដា លោកឧត្ដមសេនីយ៍ទោ ឯម កុសល ស្នងការនគរបាលខេត្តកំពង់ចាម និងលោកស្រី ដោយមានការអញ្ជើញចូលរួមពី លោកស្រី ប៉ាង ដានី អភិបាលរងខេត្ត ថ្នាក់ដឹកនាំនៃស្នងការនគរបាលខេត្ត និងលោកស្រីជាភរិយា ព្រមទាំងលោកអធិការស្រុកក្រុងទាំង១០ និងមន្រ្តីនគរបាលនារីចំណុះស្នងការដ្ឋាននគរបាលជាច្រើនរូបផងដែរ។
ថ្លែងក្នុងពិធីនោះដែរ លោកឧត្ដមសេនីយ៍ទោ ឯម កុសល ស្នងការនគរបាលខេត្តកំពង់ចាម បានធ្វេីការផ្សព្វផ្សាយពីយុទ្ធសាស្ត្រសំខាន់ៗ របស់ប្រមុខថ្នាក់ដឹកនាំរាជរដ្ឋាភិបាល ព្រមទាំងសម្តែងការកោតសរសើរចំពោះកងកម្លាំងនគរបាលនារីទាំងអស់ ដែលកន្លងមក បានចូលរួមចំណែកក្នុង កិច្ចការពារសន្តិសុខ សុវត្ថិភាព សណ្តាប់ធ្នាប់ សាធាណៈ ជូនប្រជាពលរដ្ឋ ក្នុងខេត្តកំពង់ចាម ទទួលបានលទ្ធផលល្អប្រសើរ។ ទន្ទឹមនឹងនោះក៏នៅមានកិច្ចការជំនាញច្រើនទៀត ដែលនគរបាលនារីបានចូលរួមយ៉ាងសកម្ម សហការជាមួយបុរស សម្រេចបានលទ្ធផល និងស្នាដៃលេចធ្លោជាច្រើនរួមទាំងការចូលរួមក្នុងកិច្ចការពារសន្តិសុខ ជូនព្រះមហាក្សត្រ ជូនប្រមុខរាជរដ្ឋាភិបាល ឥស្សរៈជនជាន់ខ្ពស់ និងពិធីផ្សេងៗទៀត ក៏មាននគរបាលនារីចូលរួមចំណែកផងដែរ។
ជាមួយគ្នានោះ លោកស្រី ប៉ាង ដានី អភិបាលរងខេត្តកំពង់ចាម ក៏បានផ្តាំផ្ញេីដល់នគរបាលនារីទាំងអស់ ឲ្យខិតខំប្រឹងប្រែង ក្នុងការអភិវឌ្ឍន៍សមត្ថិភាព លើកកំពស់សីលធម៌ វប្បធម៌ អហឹង្សា នៅក្នុងគ្រួសារ អង្គភាព និងសង្គមដោយចូលរួមក្នុង ចលនាអនុវត្តន៍គោលនយោបាយ ភូមិ ឃុំមានសុវត្ថិភាព និងផ្សព្វផ្សាយដល់បងប្អូនកូនចៅប្រជាពលរដ្ឋឲ្យក្លាយជាកូនល្អ សិស្សល្អ ពលរដ្ឋល្អ ជៀសវាងឲ្យឆ្ងាយពីគ្រឿងញៀន គ្រឿងស្រវឹង និងការប្រព្រឹត្តអំពើហឹង្សា ដោយប្រកាន់យកនូវសីលធ៌ម សុជីវធ៌ម និងរួមចំណែករក្សាការពារសន្តិភាព សណ្តាប់ធ្នាប់ល្អ ដើម្បីរស់នៅក្នុងសង្គមមួយប្រកបដោយភាពថ្លៃថ្នូរ សម្បូរសប្បាយ និងសុខដុមរមនាជារៀងរហូត ផងដែរ៕
ប្រភព៖ រដ្ឋបាលខេត្តកំពង់ចាម
